Павел Шарамет: ад справы Завацкага адхілена шмат сьледчых, што працавалі над ёй з самага пачатку :: Хартыя'97 :: Навiны

Сітуацыя з расьследаваньнем зьнікненьня Зьміцера Завацкага становіцца крытычнай. Пра гэта 19 студзеня заявіў кіраўнік адзьдзелу спэцпраектаў ГРТ Павел Шарамет. Паводле зьвестак Шарамета, сьледчая група, якая займаецца расьсьледаваньнем зьнікненьня Завадзкага, а таксама іншымі цяжкімі злачынствамі, знаходзіцца на мяжы роспуску.

"Сьледчыя КДБ, якія ўдзельнічалі ў гэтай справе, фактычна адхілены. Адхілены і сьледчыя МУС", - сказаў Шарамет. Паводле ягоных зьвестак, сьледчая група расьсьледавала адразу некалькі злачынстваў, ва ўчыненьні якіх падазраюцца былы афіцэр "Алмазу" Валерый Ігнатовіч, баец гэтага ж спецпадразьдзяленьня МУС Максім Малік і іншыя асобы. Гэта, прынамсі, 7 злачынных эпізодаў: забойствы прадпрымальнікаў у Жодзіна і Барысаве, забойства прадпрымальніка і яго прыёмнай дачкі ў Мар`інай Горцы, забойства азербайджанскай сям`і ў Мінску, зьбіцьцё кіраўніка кантрольна-рэвізійнага ўпраўленьня Міністэрства культуры Грыгор`ева, забойства кіраўніка беларускага адьдзяленьня РНА Глеба Самойлава, выкраданьне Зьміцера Завацкага. Усе злачынствы ўчынены рознымі людзьмі, але ўсе яны ўваходзілі ў агульную злачынную групоўку.

Гэтыя злачынствы маглі быць раскрыты некалькі месяцаў таму - сьледчыя выходзілі на падазроных, у прыватнасьці, байца "Алмазу" Маліка. Але іх спынялі. Ды і ў саміх сьледчых узьнікалі сумненьні: усё ж пад падазрэньнем аказваліся супрацоўнікі элітнага падразьдзяленьня МУС.

Ігнатовіч, паводле слоў Шарамета, "быў адной з ключавых фігур". Тым не меньш, сам Ігнатовіч, які знаходзіцца ў сьледчым ізалятары, сваёй віны не прызнае, адмаўляецца хадзіць на допыты, куды яго дастаўляюць на насілках, выкрыквае "Няхай жыве прэзыдэнт Лукашэнка!" і пагражае следчым "выразаць" іх сем`і.

"Усё залежыць ад пазіцыі цяперашняга генэральнага пракурора Віктара Шэймана і міністра ўнутраных справаў Уладзіміра Навумава, - сказаў Шарамет. - Па гэтых справах ёсьць сьведкі, апазналыя некаторых забойцаў, рэчавыя і іншыя доказы".

На думку Шарамета, адстаўкі старшыні КДБ Уладзіміра Мацкевіча і генэральнага пракурора Алега Бажэлкі адбыліся з-за таго, што сьледчая група атрымала зьвесткі аб дачыненьні некаторых супрацоўнікаў спецыяльнай брыгады хуткага рэагаваньня МУС, якую ўзначальвае Зьміцер Паўлючэнка, да шэрагу злачынстваў, у тым ліку выкраданьняў Віктара Ганчара і Юрыя Захаранкі. Паўлючэнка затрымалі. Быў праведзены вобыск у яго ў доме і на службе.

Аднак дзеяньні сьледчых былі спынены асабіста сакратаром Савета бясьпекі Віктарам Шэйманам. Пасля гэтага Паўлючэнка быў выпушчаны са сьледчага ізалятару. А Мацкевіч і Бажэлка пазбавіліся сваіх пасадаў.

"Галоўная ахвяра гэтых перастановак - Мацкевіч і сьледчыя КДБ, - сказаў Шарамет. - Яны былі ўпэўненыя, што Лукашэнка ня ведаў пра супрацьпраўныя дзеяньні некаторых супрацоўнікаў спэцбрыгады МУС, якая непасрэдна падпарадкоўвалася сакратару Савета бяспекі, і разьлічвалі, што яны будуць пакараныя. Атрымалася ж наадварот. Прэзыдэнт выступіў у абарону гэтых людзей".