Банк "БелБалтия" будзе зьліквідаваны прымусова :: Хартыя'97 :: Навiны

Савету Міністраў і Нацыянальнаму банку Беларусі даручана вырашыць пытаньне аб прымусовай ліквідацыі акцыянернага камерцыйнага банку "БелБалтыя". Пра гэта БелаПАН паведаміў начальнік упраўленьня інфармацыі галоўнага банку краіны Анатоль Драздоў. Паводле яго словаў, да 25 студзеня павінен быць распрацаваны механізм пераафармленьня і пагашэньня абавязацельстваў перад укладчыкамі "БелБалтыі".

Нагадаем, што па прычыне перавышэньня устаноўленага нарматыву суадносінаў "уклады насельніцтва/капітал банка" больш як год таму ў "БелБалтыі" была прыпынена ліцэнзія на прыцягненьне ўкладаў насельніцтва. Аднак сродкі насельніцтва, паводле зьвестак Нацбанка, прыцягваліся.

"БелБалтыя", аднак , мае актывы для выхаду з крызісу, але за мяжой. Асноўная праблема заключаецца ў іх вяртаньні і рэалізацыі. Цяперашнія кіраўнікі банка ў канцы 2000 года сцьвярджалі, што для гэтага спатрэбіцца ня менш за адзін-два гады. Яшчэ месяц таму Нацбанк не выключаў аказаньня дапамогі "БелБалтыі" крэдытнымі рэсурсамі пры ўмове прадастаўленьня забяспечанага залогу.

"БелБалтыя" - адзін з лідэраў банкаўскай сістэмы Беларусі па працы з укладамі насельніцтва. У яго каля 10 тысяч укладчыкаў з 8 гарадоў. За 6 гадоў працы банк выплаціў каля 13 мільёнаў долараў працэнтаў па ўкладах насельніцтва.