Пастаўкі беларускай сталі ЗША лімітаваны :: Хартыя'97 :: Навiны

Дэпартамент камерцыі ЗША прыняў 17 студзеня рашэньне ўвесьці мытныя дэпазіты на імпарт сталёвай арматуры з васьмі краінаў, у ліку якіх і Беларусь. У дэпартаменце палічылі, што амэрыканскія вытворцы цярпяць ад несправядлівай канкурэнцыі з боку пастаўшчыкоў арматуры зь Беларусі, Інданезіі, Карэі, Кітая, Латвіі, Малдовы, Польшчы і Украіны, якія прадаюць сваю прадукцыю на амэрыканскім рынку па дэмпінгавых коштах.

Цяпер Беларускі металургічны завод у Жлобіне, прадукцыя якога раней экспартавалася ў Злучаныя Штаты, быў бы вымушаны плаціць Мытнай службе ЗША дэпазіт памерам у 73,98 адсоткі ад кошту тавара. У Дэпартаменце камерцыі вырашылі, што менавіта такая розніца паміж сёньняшнімі коштамі і "справядлівымі рыначнымі" коштамі на беларускую арматуру.

Як паведамілі БелаПАН ва ўпраўленьні зьнешнеэканамічнай дзейнасьці БМЗ, завод, які прыпыніў пастаўкі ў Злучаныя Штаты адразу пасьля пачатку антыдэмпінгавага расьследаваньня ў першай палове 2000 года, не зьбіраецца аднаўляць гэтыя пастаўкі, пакуль у ЗША не будзе вынесенае канчатковае рашэньне. Раней БМЗ экспартаваў каля 15 адсоткаў сваёй прадукцыі на амэрыканскі рынак.

Чакаецца, што Дэпартамент камерцыі канчаткова вырашыць у красавіку, ці зьяўляюцца сёньняшнія кошты на беларускую арматуру дэмпінгавымі. А ў траўні Міжнародная гандлёвая камісія ЗША павінная вырашыць, ці нанесьлі такія пастаўкі шкоду амэрыканскім вытворцам.