Рэжым Кастра арыштаваў дэпутата ў ветэрана "аксамітнай" рэвалюцыі :: Хартыя'97 :: Навiны

Чэскі дэпутат, былы міністар фінансаў Іван Піліп, а таксама адзін зь лідараў "аксамітнай" рэвалюцыі Ян Бубэнік былі затрыманыя 28 студзеня на Кубе. Кубінскія ўлады абвінавачваюць чэскіх грамадзянаў у тым, што яны быццам былі высланыя амэрыканскай арганізацыяй FREEDOM HOUSE, каб ўсталяваць кантакты з кубінскімі дысыдэнтамі.

Вось які ліст распаўсюдзілі ўлады Кубы, дзе прадстаўляюць свае "доказы" віны Піліпа і Бубеніка:

"Акцыя, у якой ўдзельнічалі спадары Піліп і Бубенік, ня ёсьць для нашай краінай новай. Гэта толькі далейшы прыклад дзеяньняў, накіраваных на ўмяшальніцтва і дэстабілізацыю, якой займалася і займаецца Чэская рэспубліка супраць кубінскага рэвалюцыйнага працэсу. Гэтая кансьпірацыя распачалася ў 1989 годзе… З таго часу кіраўніцтва ЧР захоўвае адносна Кубы непрыхавана варожыя стасункі… Чэская дыпляматычная місія стала месцам сканцэнтраваньня паклёпаў на Кубу, якая зьяўляецца камунікацыйным каналам з амэрыканскай тэрыторыяй…"

Аб вызваленьні чэскіх грамадзянаў выступіў старшыня Эўрапейскай камісіі Романо Проды. Аднак МЗС Кубы заявіў, што толькі прабачэньне Чэскай рэспублікі за ўнутранае ўмяшальніцтва можа стаць першым крокам да сумеснага дыялёгу наконт інцыдэнту.

Вось як адрэагаваў на гэта прэм`ер-міністар Мілош Зэман:

Я не бачу прычыны, чаму чэскі ўрад мусіць прасіць прабачэньне ў кубінскіх уладаў. Па-другое, супраць нашых двух затрыманых грамадзянаў не было прад`яўленае аніводнае абвінавачваньне і не былі прапанаваныя ніякія доказы. Значыць, яны ні ў чым не вінаватыя.

Чэскі прэзыдэнт Вацлаў Гавэл пацьвердзіў, што Чэхія ня мусіць прасіць прабачэньне ў кубанскіх уладаў. Гавэл клапоціцца аб вызваленьні Піліпа і Бубеніка, зьвяртаючыся да ўсіх міжнародных структураў з заклікам паўплываць на Фідэля Кастра.

Сытуацыя ўскладняецца тым, што кубанскае кіраўніцтва адмаўляецца ад любых кантактаў з уладамі Чэскай рэспублікі. Адзіныя чэхі, зь якімі кубанцы згодныя мець кантакты, - дэпутаты ад чэскай камуністычнай партыі. Тым ня меньш, 29 студзеня старшыня Сэнату ЧР Пэтр Пітгард адправіўся на "выспу свабоды", каб абараняць грамадзянаў сваёй краіны.