Беларуская Сацыяль - Дэмакратычная Партыя (Народная Грамада) перад расколам

так паведамілі ўчора на прэс-канферэнцыі некалькі кіраўнікоў партыі Аляксей Кароль, Анатоль Гурыновіч, Павал Знавец і Анатоль Сідарэвіч. Выратуе адзінства партыі, на іхную думку, толькі неадкладная зьмена кіраўніцтва партыі на чале зь Мікалаем Статкевічам.

Яны заявілі, што дзейнасьць партыі фактычна спаралізаваная з-за глыбокіх разыходжаньняў між сябрамі Цэнтральнага камітэту. Паводле лідэра фракцыі Аляксея Караля, прычынай расколу сталі прынятыя мінулай нядзеляй пастановы аб удзеле прадстаўнікоў партыі ў давыбары ў "палату прадстаўнікоў". Цэнтральны камітэт партыі зацьвердзіў іх перавагаю ў чатыры галасы, пры адсутнасьці нязгодных з такой пазыцыяй членаў кіраўніцтва.

Аляксей Кароль, Анатоль Гурыновіч, Павал Знавец і Анатоль Сідарэвіч лічаць, што ўдзел у давыбарах у так званую Палату дыскрэдытуе партыю ў вачох іншых прадстаўнікоў дэмакратычных сілаў і парушае пастанаўленьні мінулага Кангрэсу дэмакратычных сілаў аб байкоце фарсу. Прадстаўнікі апазыцыйнай партыйнай фракцыі лічаць, што менавіта дзякуючы пазыцыі Мікалая Статкевіча БСДП апынулася на мяжы расколу, а таксама дазволі ўладам гаварыць пра раскол ў шэрагах апазыцыі.

Каб захаваць партыйнае адзінства, сябры фракцыі пачалі збор подпісаў сярод партыйцаў за правядзеньне ў сакавіку ці красавіку пазачарговага зьезду БСДП. На зьезьдзе прадстаўнікі фракцыі будуць дамагацца абраньня новага кіраўніцтва "Народнай Грамады" і вяртаньня партыі на плятформу аб`яднанай дэмакратычнай апазыцыі. Калі ж большасьць дэлегатаў зьезду не падтрымае сябраў фракцыі, тады яны гатовыя выйсьці з шэрагаў "Народнай Грамады" і стварыць новую сацыяль-дэмакратычную партыю.