ФБР арыштавала перуанца, што падазраецца ў закупках зброі ў Беларусі :: Хартыя'97 :: Навiны

Супрацоўнікі Федэральнага бюро расьследаваньняў ЗША арыштавалі на мінулым тыдні ў горадзе Маямі грамадзяніна Перу Венэра Гарыда, які, сярод іншага, падазраецца ў махлярстве пры закупках зброі для перуанскай арміі ў краінах Усходняй Эўропы, у тым ліку ў Беларусі. Улады Перу выпісалі ордэр на арышт Гарыда 19 студзеня.

ФБР паведаміла, што Гарыда некалькі тыдняў таму паклаў на рахунак у банку Маямі 15 мільёнаў даляраў ЗША. Сьледства лічыць, што гэтыя грошы ён атрымаў ад махлярства з нерухомасьцю, пенсійнымі фондамі і зброяй. Гарыда падазраюць у тым, што ён працаваў разам з Уладзімера Мантэсінасам, былым кіраўніком перуанскай разьведкі, які займаўся закупкамі зброі, у тым ліку арганізоўваў кантракты на закупку ваенных самалётаў у Беларусі.

У Швэйцарыі былі "замарожаныя" каля 70 мільёнаў даляраў ЗША на 17 рахунках, якія, на думку сьледчых, належаць Мантэсінасу і былі адкрытыя на імёны падстаўных асоб. Сьледства лічыць, што гэтыя грошы Мантэсінас атрымліваў у якасьці "камісійных" ад кантрактаў на закупку зброі па ўсім сьвеце - ад Беларусі да Іарданіі.

Паводле розных крыніцаў, Перу закупіла ў Беларусі пачынаючы з 1996 года ад 12 да 21 зьнішчальніка "МіГ", ад 14 да 18 штурмавікоў "Су-25", а таксама сыстэмы супрацьпаветранай абароны. Як паведамляе амэрыканскае выданьне Christian Science Monitor, агульная сума кантрактаў толькі на пастаўкі "МіГаў" зь Беларусі і запасных частак да іх з Расеі склала амаль мільярд даляраў ЗША.

Дагэтуль невядома, куды пайшлі грошы, атрыманыя Беларусьсю ад гэтых кантрактаў.