На мяжы зь Літвой арыштаваны дэпутат Цярэня. З канфіскацыяй маёмасьці :: Хартыя'97 :: Навiны

Намесьнік Старшыні Вярхоўнага Савету XIII скліканьня Генадзь Цярэня быў зьняты зь цягніка і затрыманы 29 студзеня 2001 г. у 0 гадзін 40 хвілінаў на чыгуначнай станцыі Гудагай (Гродзенская вобласьць). Супрацоўнікі мытні правялі асабісты дагляд і канфіскавалі ў Цярэні відэакамеру Sony і матар`ялы сэмінару "Негвалтоўная барацьба за дэмакратыю і дэмакратычныя працэсы на Беларусі", які праходзіў у Вільнюсе пад эгідай Літоўскай асацыяцыі правоў чалавека. Затрыманьне і канфіскацыя праводзіліся без складаньня пратаколу затрыманьня з перабольшваньнем усталяваных тэрмінаў.

Як паведаміў БХК Генадзь Цярэня, пратоколы ад адміністратыўным мытным парушэньні і канфіскацыі рэчаў і дакумэнтаў не адпавядаюць рэчаіснасці, утрымоўваюць ілжывыя абвінавачваньні ў непадпарадкаванасьці распараджэньня асобы мытнага органа РБ і ў брыдкаслоўі. Пры складаньні пратаколаў супрацоўнікі мытні хадзілі за кансультыцыямі да начальства. Астатнія ўдзельнікі вяртаюцца ў Менск сёньня й заўтра. Напэўна, на мяжы іх таксама чакае "цёплы" прыём.

Нагадаем, што яшчэ напачатку сэмінару Амбасада Рэспублікі Беларусь у Літоўскай Рэспубліцы зьвярнулася ў МЗС Літвы з нотай пратэсту супраць правядзеньня сэмінару аб метадах негвалтоўнай барацьбы з рэжымам. На што МЗС адказала, што сэмінар праводзіцца недзяржаўнай арганізацыяй, і ўлады ня маюць да яго ніякага дачыненьня. У сэмінары прымалі ўдзел каля 40 прадстаўнікоў Вярхоўнага Савету, палітычных партыяў і грамадзкіх рухаў.

А 30 студзеня ў беларускае зьнешнепалітычнае ведамства быў выкліканы амбасадар Літвы ў Рэспубліцы Беларусь Ёнас Паслаўскас, якому заяўлена, што МЗС Беларусі "заклапочана" правядзеньнем у Вільнюсе сэмінару, "які насіў яўна дэструктыўны характар і быў накіраваны на стварэньне неспрыяльных умоваў напярэдадні выбарчай кампаніі па выбарах прэзыдэнта Рэспублікі Беларусь".