Яшчэ адзін напад на офіс недзяржаўнай арганізацыі :: Хартыя'97 :: Навiны

адбыўся на мінулыя выходныя ў Слоніме. Выкраданьне аргтэхнікі і інфармацыі рэсурсных цэнтраў становіцца тэндэнцыяй у Беларусі, адзначаюць прадстаўнікі "трэцьцяяга сэктару". На гэты раз злачынцы ўзламілі дзьверы ў офісе тамтэйшага грамадзкага цэнтру "Воля да разьвіцьця".

Як паведаміў кіраўнік цэнтру Міхась Варанец, зламысьнікі нічога не скралі, таму што на той момант усё абсталяваньне і дакуманты ў офісе адсутнічалі. Ён таксама паведаміў, што летась у кастрычніку офіс "Волі да разьвіцьця" ужо быў абрабаваны - тады зніклі 2 кампутары, 2 друкаркі, капіравальны апарат, мадэм, сканэр і факс. Знайсьці злачынцаў міліцыі не ўдалося.

26 студзеня кіраўнік арганізацыі набыў неабходнае абсталяваньне, а раніцай 30 студзеня спэцыялісты "Аховы" павінны былі распачаць устаноўку сігналізацыі ў офісе. На думку Міхася Варанца, злодзеі меркавалі, што адноўленая з папярэдняга крадзяжу тэхнічная база арганізацыі знаходзіцца ў офісе.

Нагадаем, што у ноч на 27 студзеня быў абрабаваны офіс Брэсцкага цэнтру падтрымкі грамадзянскіх ініцыятываў "Вежа", у ноч з 25 на 26 студзеня - офіс Верхнядзьвінскага інфармацыйна-рэсурснага цэнтру "Рубон".

Грамадзкае аб`яднаньне "Воля да разьвіцьця" зьяўляецца рэсурсным цэнтрам Слонімскага раёну. Рэсурсныя цэнтры - гэта грамадзкія арганізацыі, якія займаюцца падтрымкай і развіцьцём грамадзянскіх ініцыятываў на месцах. Паслугамі і абсталяваньнем слонімскага цэнтру карыстаецца 13 грамадзкіх арганізацыяў рэгіёну. На базе цэнтру рыхтуецца да друку 6 выданьняў малых накладаў.