Прадпрымальнікі Салігорску пачалі бязтэрміновую забастоўку :: Хартыя'97 :: Навiны

З 1 лютага пачалася бестэрміновая забастоўка індывідуальных прадпрымальнікаў Салігорску (Менская вобласьць). Падставаю для забастоўкі стала рэзкае пагаршэньне ўмоваў працы мясцовых "чаўнакоў". У прыватнасьці, па выніках мінулага году кошт арэнды гандлёвых месцаў павялічыўся ў 5,2 разы. Праводзяцца бясконцыя праверкі кантралюючымі органамі. Як ушчамленьне сваіх правоў прадпрымальнікі расцэньваюць пастанову Дзяржаўнага мытнага камітэту аб мытным афармленьні тавараў, вырабленых у трэціх краінах і ўвезеных у Беларусь з Расеі. Апрача таго, яны баяцца падпісаньня дэкрэту аб патэнтнай сістэме ў яго цяперашнім выглядзе: уносімыя ў дакумант на стадыі падрыхтоўкі папраўкі могуць значна пагоршыць фінансавае становішча прадпрымальнікаў.

Прадпрымальнікі Салігорску наважаны баставаць да выкананьня ўладамі ўсіх патрабаваньняў. Сярод іх - адмена пастановы ДМК аб мытным афармленьні тавараў і ўказа прэзыдэнта № 7 ад 4 студзеня 2000 года "Аб удасканальваньні парадку правядзеньня і кантролю зьнешнегандлёвых аперацый" у частцы, датычнай індывідуальных прадпрымальнікаў; змяншэньне кошту арэнды гандлёвых месцаў; зьніжэнне максімальнага памеру адміністрацыйнага штрафу да 10 мінімальных заробкаў; абмежаваньне колькасьці праверак кантралюючымі органамі да аднаго разу ў год, апрача праверак уплаты фіксаванай стаўкі падатку і арэнды.

Аб пачатку забастоўкі салігорскія прадпрымальнікі праінфармавалі Адміністрацыю прэзыдэнта. Міністэрства прадпрымальніцтва і інвестыцыяў, Камтэт дзяржкантролю, Дзяржаўны падатковы камітэт, Менскі аблвыканкам і Салігорскі гарвыканкам.