Ёсьць небясьпечнасьць у тым, што ўлады Беларусі могуць "у чарговы раз пайсьці на працяг тэрміну сваіх паўнамоцтваў шляхам прыняцьця неканстытуцыйных рашэньняў". Такое меркаваньне выказана ў заяве Свабоднага прафсаюзу Беларускага, што была распаўсюджана ў панядзелак. Апасеньні гэтыя, тлумачыцца ў заяве, узьнікаюць у сувязі з заявамі службовых асобаў дзяржавы: "Так, Лукашэнка дагаварыўся да таго, што пад выглядам незалежных назіральнікаў за выбарамі рыхтуюцца баявікі... а старшыня Цэнтрвыбаркаму Лідзія Ярмошына заявіла, што ў выбарчыя камісіі ня будуць дапушчаны прадстаўнікі грамадзкіх арганізацыяў".

---

Сьвятлана Завацкая, жонка прапалага ўлетку мінулага года ў Менску журналіста Зьміцера Завацкага, зьвярнулася да сусьветнай супольнасьці з заклікам дапамагчы знайсьці яе мужа. Тэкст звароту Сьвятланы апублікаваны на швэцкай мове на вэб-сайце www.vitryssland.nu. Мы прапануем вам яго поўны пераклад. Сьвятлана таксама зьвярнулася з такім лістом да Лукашэнкі й Пуціна, аднак паводле яе словаў, надзея на ўлады вяльмі слабая.

---

Крымінальная справа па факце зьнявагі Лукашэнка атрымала разьвіцьцё 5 лютага. Гаворка вядзецца пра ўдзельнікаў акцыі за псыхіятрычнае абсьледаваньне Лукашэнкі, якая ладзілася ў Барысаве 16 студзеня. 5 лютага двох ўдзельнікаў акцыі - Алеся Ясюк і Аляксандар Абрамовіч - ператварыліся зь сьведкаў у падазраваных. Яны адмовіліся даваць паказаньні, паколькі ня вераць у прафэсійную дасканаласьць супрацоўнікаў барысаўскае пракуратуры.

---

Першы намесьнік міністра абароны Беларусі, начальнік Галоўнага штабу ўзброеных сілаў краіны Міхаіл Казлоў вызвалены ад пасады. Адпаведны ўказ Лукашэнка падпісаў 5 лютага. Паводле інфармацыі "Інтэрфаксу", Казлоў залічаны ў рэзэрв міністра абароны для наступнага звальненьня ў запас. Ня выключана, што ўжо 6 лютага будзе прызначаны новы першы намесьнік міністра абароны.

---

Міністр замежных справаў Беларусі Хвастоў сёньня ў чарговы раз сустрэнецца з главою Кансальтатыўна-назіральнае групы АБСЭ ў Беларусі Хансам-Георгам Вікам. Як паведамляецца афіцыйна, "бакі маюць намер абмеркаваць актуальныя пытаньні далейшага супрацоўніцтва". У апошні час кантакты паміж КНГ АБСЭ і беларускім МЗС сталі рэгулярнымі - беларускі бок абвінавачвае КНГ АБСЭ то ў падрыхтоўцы тэрарыстаў, то ў фінансаваньні апазыцыі на што КНГ вымушаная адказваць нотамі пратэсту.

---

Аднаго мільярда рублёў дасягнула агульная сума запазычанасьці па зарплаце на прадпрыемствах і арганізацыях Магілёўскай вобласьці. Пра гэта казалася 5 лютага на ранішняй нарадзе ў Магілёўскім аблвыканкаме. Зазначалася, што каля 70 адсоткаў усёй сумы доўгу прыпадае на гаспадаркі аграпрамысловага комплексу; удзельная вага запазычанасьці ў месячным аб`ёме зарплаты вобласьці склала 3,9адсоткі.

---