40% вучоных-эмігрантаў зь Беларусі з`язджаюць у ЗША :: Хартыя'97 :: Навiны

Згодна са зьвесткамі статыстычнага абсьледаваньня, праведзенага ў лістападзе 2000 года сярод навуковых арганізацыяў і ВНУ рэспублікі Цэнтрам маніторынгу міграцыі навуковых і навукова-педагагічных кадраў Інстытуту сацыялогіі Нацыянальнай акадэміі навук Беларусі, у 1999 годзе агульная колькасьць навуковых работнікаў і выкладчыкаў ВНУ рэспублікі, якія эмігрыравалі і засталіся за мяжой, узрасла больш чым на 9адсоткаў.

Па краінах-рэцыпіентах асноўныя патокі інтэлектуальнай эміграцыі зь Беларусі ў 1999 годзе разьмеркаваліся наступным чынам: ЗША - 39 адсоткаў ад агульнай колькасьці тых, хто выехаў за мяжу на пастаяннае месца жыхарства або застаўся за мяжой; Германія - 21 адсотак; Ізраіль - 9 адсоткаў. Сярод іншых краінаў-рэцыпіентаў прадстаўлены Расея, Канада, Польшча, Вялікабрытанія, Швэцыя, Галяндыя, Францыя, Чэхія.

На працягу 1996-1999 гадоў штогод эмігрыравалі за мяжу і заставаліся за мяжой у сярэднім па 70 чалавек. Многа гэта ці мала? - задаюць пытаньне вучоныя і зазначаюць, што па колькасьці навуковых работнікаў вышэйшай кваліфікацыі (дактароў і кандыдатаў навук) штогадовая інтэлектуальная эміграцыя зь Беларусі параўнальная з колькасьцю навуковых работнікаў гэтай кваліфікацыі, занятых даследаваньнямі і распрацоўкамі ў 1999 годзе ў Віцебскай вобласьці.