Майкл Козак запэўнівае аб прызнаньні Вярхоўнага савету 13 скліканьня :: Хартыя'97 :: Навiны

Злучаныя Штаты Амэрыкі працягваюць прызнаваць Вярхоўны Савет Беларусі 13-га скліканьня легітымным беларускім парлямантам, заявіў у інтэрв`ю беларускай службе Радыё Свабода 23 лютага Надвычайны і Паўнамоцны Амбасадар ЗША ў Беларусі Майкл Козак, які напярэдадні ўручыў Аляксандру Лукашэнку даверчыя граматы. Паводле словаў амбасадара, нават калі тэрмін паўнамоцтваў Вярхоўнага Савета падыйшоў да канца ён лічыцца легітымным, "пакуль яго месца не зойме парлямант, абраны ў рамках Канстытуцыі".

Што да выбараў у Нацыянальны сход Беларусі ў кастрычніку 2000 года, то, паводле словаў Майкла Козака, стаўленьне да іх Злучаных Штатаў грунтуецца на высновах структураў АБСЭ, якія не прызналі іх свабоднымі і справядлівымі, таксама як і рэферэндум 1996 года. Разам з тым амбасадар ЗША лічыць, што "трэба глядзець у будучыню і не паўтараць мінулых памылак".

Менавіта так, лічыць Майкл Козак, трэба ставіцца і да выбараў прэзыдэнта Беларусі. "Злучаныя Штаты прызнавалі прэзыдэнта Лукашэнку прэзыдэнтам з 1994 года, калі ён быў належным чынам абраны прэзыдэнтам, і мы працягвалі гэта рабіць", - заявіў пасол. І, хаця, паводле ягоных словаў, "ЗША не лічылі тыя метады, якімі тэрмін прэзыдэнцкіх паўнамоцтваў Лукашэнкі быў працягнуты ў 1996 годзе, законнымі", пытаньне цяпер трэба ставіць так: ці будзе прэзыдэнт, якога абяруць належным чынам сёлета, прызнаны міжнароднай супольнасьцю.