Страйк прадпрымальнікаў аказаўся безвыніковым :: Хартыя'97 :: Навiны

Агульнанацыянальны страйк прадпрымальнікаў адбыўся ў Беларусі 28 лютага. Ейныя арганізатары заяўляюць пра посьпех мерапрыемства. Між тым, адчувальных вынікаў гэтая акцыя, як і папярэднія страйкі апошніх месяцаў, не прынесла. А многія лідары мясцовых прадпрымальніцкіх прафсаюзаў абвінавачваюць кіраўніцтва стачкаму ў палітыканстве і выкарыстаньні праблемаў "чалнакоў" ў асабістых палітычных мэтах.

Па заявах арганізатараў ў стайку прыняло ўдзел больш 160.000 прадпрымальнікаў і асобаў, што працуюць па найму з усіх гарадоў Рэспублікі Беларусь. У Гародні й Гарадзенскай вобласьці, па іх словах, баставала больш 90% прадпрымальнікаў і асобаў, якія працуюць па найму. У Менску - больш 70%, у Менскай вобласьці - больш 60% прадпрымальнікаў. У Брэсьце й Брэсцкай вобласьці - больш 80% прадпрымальнікаў. У Віцебску - каля 60%.

Страйк быў арганізаваны Стачкамам прадпрымальнікаў Рэспублікі Беларусь з асноўнымі патрабаваньнямі - не дапусьціць павышэньня ставак фіксаванага падатку і адстаўкі старшыні Дзяржаўнага Падаткавага Камітэту Рэспублікі Беларусь.

Аднак гучныя заявы лідараў страйку пра ейны посьпех абвяргаюцца паведамленьнямі з рэгіёнаў. Так, прыватныя прадпрымальнікі, якія працуюць на рынках Віцебскай вобласьці, адмовіліся браць удзел у забастоўцы. У гутарцы з карэспандэнтам БелаПАН намесьнік старшыні прафсаюзнага камітэту рынку "Смаленскі" - найбуйнейшага ў Віцебску - Тамара Юневіч падкрэсьліла, што 28 лютага ўсе рынкі абласнога цэнтру, а таксама Полацку, Наваполацку, Воршы і іншых гарадоў Віцебшчыны працуюць у звычайным рэжыме.

"Прадпрымальнікі не жадаюць, каб іхнія праблемы ў сувязі з антырынкавай палітыкай дзяржавы скарыстоўваліся як трамплін для асобных спадароў-самазванцаў, - заявіла Юневіч. - Тым больш, мы падазравалі, што гэтыя самазванцы вядуць двайную гульню, дапамагаючы ўладзе выявіць нашых актывістаў, каб потым, у патрэбны момант, нейтралізаваць іх".

Пра такую ж сытуацыю можна казаць і ў іншых рэгіёнах.

Страйк выявіў, што даверу старшыні стачкаму Валеры Леванеўскаму прыватныя прадпрымальнікі ў сваёй большасьці не маюць. Леванеўскі ўжо неаднаразова заяўляў, што ён будзе балатавацца на пост прэзыдэнта ў гэтым годзе. У сваіх выступленьнях ён крытыкуе больш дэмакратычныя сілы, чым уладу, зь якой па ягоных словах, "заўсёды можна дамовіцца".