У Беластоку зьявілася асацыяцыя беларускіх палітычных бежанцаў :: Хартыя'97 :: Навiны

2 сакавіка ў Беластоку была зарэгістраваная Асацыяцыя беларускіх палітычных уцекачоў. Яна ставіць перад сабой мэту даваць прававую, інфармацыйную, псыхалягічную і фінансавую дапамогу людзям, што пакінулі краіну з палітычных матываў. Асацыяцыя будзе таксама дапамагаць усталёўваць кантакты з польскімі і міжнароднымі інстытуцыямі і арганізацыямі. У заяве, распаўсюджанай арганізацыйным камітэтам Асацыяцыі, выказваецца закляпочанасьць фактам палітычнага перасьледу беларускіх уцекачоў з боку беларускіх уладаў на тэрыторыі Польшчы, а таксама пагрозай прымусовае экстрадыцыі да Беларусі.

Так, баючыся наплыву палітычных уцекачоў зь Беларусі, Дэпартамэнт па справах уцекачоў МУС Польшчы ў апошнія два гады, парушаючы "Канвэнцыю ААН аб уцекачах" і "Закон аб іншаземцах у Польшчы", зацягвае тэрміны разгляду справаў палітычных уцекачоў зь Беларусі на гады.

Паводле заявы, прычынай гэтага магло стаць тое, што некаторыя асобы, што шукаюць палітычнага прытулку ў Польшчы, ў пэрыяд разгляду іх спраў вярнуліся ў Беларусь, чым дыскрэдытывалі ўсіх беларускіх апазыцыянэраў, якія чакаюць атрыманьня статусу ўцекача ў Польшчы. Паводле зьвестак арганізацыйнай групы Зьвязу, зараз у Польшчы палітычнага прытулку чакаюць некалькі дзясяткаў беларускіх грамадзянаў.