Ярмошын выбраў прыкладам расейскую інфляцыю :: Хартыя'97 :: Навiны

Прам`ер - міністар Беларусі Ўладзімер Ярмошын заявіў, што ўрад рэспублікі лічыць сваёй асноўнай задачай у 2001 годзе зраўняць беларускую інфляцыю з расейскай. Ярмошын сказаў, што дабіцца гэтага магчыма, калі "аказаць супрацьдзеяньне росту коштаў і тарыфаў ва ўсіх сэктарах эканомікі". Менавіта якім чынам аказвацца супрацьдзеяньне, Ярмошын не патлумачыў. Аднак зь ягоных словаў варта зрабіць выснову, што да сёньня такога супрацьдзеяньня не аказвалася, інакш беларуская эканоміка не трапіла ў тое, бядотнае становішча, у якім знаходзіцца.

Аднак зараз кіраўніцтва рэспублікі, па ўсёй верагоднасьці, прыняла рашэньне ва ўсім прыпадобіцца Расеі. Уладзімер Ярмошын так і заявіў у пятніцу на паседжаньні з амбасадарамі Беларусі ў замежных краінах. "Галоўнаю мэтаю зьяўляецца дасягненьне ўзроўню інфляцыі, роўнага з расейскім", - сказаў Уладзімер Ярмошын.

Усё ж такі дзіўна: любы адказны ўрад любой краіны ставіць сабе за мэту максымальнае зьніжэньне ўзроўню інфляцыі, а зусім не адпаведнасьць гэтага ўзроўня інфляцыі якой-небудзь іншай краіне, няхай нават самай сяброўскай. А калі ўлічыць прагнозы некаторых расейскіх эканамічных аналітыкаў, якія сцьвярджаюць, што на эканоміку Расеі насоўваецца найцяжкая крыза, то парываньне беларускага ўраду становіцца зусім не зразумелым.