Чарнобыльскія перасяленцы вяртаюцца ў "зону" :: Хартыя'97 :: Навiны

Каля ста сем`яў перасяленцаў з Чарнобыльскай зоны добраахвотна вярнуліся ў паселішчы, забруджаныя радыёактыўнымі выкідамі. Напачатку 90-х з забруджаных ад выбуху на ЧАЭС мясьцінаў у г. Масты Гарадзенскай вобласьці перасялілася 360 сем`яў. На сёньняшні дзень іх засталося толькі 250. У Мастах іх чакалі новыя кватэры. І менавіта "кватэрнае пытаньне" стала штуршком да канфлікту паміж перасяленцамі і мясцовымі жыхарамі.

Мастаўчане, што стаялі ў чарзе на кватэру, вырашылі, што чарнобыльцы занялі жылплошчу, якая мусіла дастацца ім. Старшыня мастоўскага адзьдзяленьня дабрачыннага фонду "Дзецям Чарнобыля" Сьвятлана Шульга паведаміла, што былі факты дыскрымінацыі з боку мясцовага насельніцтва.

У прыватнасьці, ёй самой адмовілі ў прыёме на працу на падставе таго, што яна - з Чарнобльскай зоны. Чыноўнік, які прымаў яе на працу, пры гэтым заявіў, што "чарнобыльцы - ня людзі". І сёньня праблема працаўладкаваньня па-ранейшаму вельмі актуальная.

Прыкладна палова горада працуе на прадпрыемтсве "Мастыдрэў", дзе заробак рабочага складае ня больш як 30-40 тысячаў. Менавіта эканамічная праблема вымушае людзей вяртацца ў забруджаную зону. Свае кватэры ў Мастах "чарнобыльцы" прадаюць і купляюць у родных мясьцінах. Аднак на забруджанай тэрыторыі ў хворых людзей абвастраюцца хваробы, асабліва ў дзяцей. І ехаць адтуль ужо няма куды - прадаць кватэру, калі і атрымаеца, дык толькі за капейкі.

На дзяржаву таксама спадзявацца не выпадае - вяртаючыся ў родныя мясьціны, перасяленцы пішуць расьпіску, што ніякіх прэтэнзіяў да дзяржавы ня маюць. Так і паміраюць яны ў сваіх родных мястэчках - Чачэрску, Нароўлі, Брагіне, Ветцы, Хойніках...