ЗУБР праводзіць акцыі ў Менску, Віцебску й Брэсьце :: Хартыя'97 :: Навiны

Працяг акцыі пратэсту народнага супраціву ЗУБР адбудзецца сёньня ўдзень у Менску на плошчы Волі. Учора, нагадаем, шэсьць актывістаў гэтага новага руху правялі ля будынка рэзыдэнцыі Лукашэнкі пікет пратэсту супраць зьнікненьня вядомых у Беларусі людзей. Трое ўдзельнікаў акцыі былі затрыманыя, сёньня іх чакае суд. Супраць трох ніякіх рэпрэсіяй не прадпрымалася. Акрамя Менску аказваецца, розныя акцыі ЗУБРА адбыліся таксама ў Віцебску й Брэсьце. Акрамя таго, у Беларусі працягваецца распаўсюджаньне спэцыяльнага выпуску газэты "Наша Свабода", які прысьвечаны праблемам зьнікненьня людзей. Матэрыялы спэцвыпуску - сёньня на нашым сайце. Сачыце за абнаўленьнямі.

3 сакавіка несанкцыянаваную акцыю "Беларусь - краіна зьніклых людзей" правяла у сквэры ля пляцу Леніна Віцебская суполка ЗУБРА, перадае радыё "Свабода". Каля пяцідзесяці юнакоў і дзяўчат адразу прыцягнулі ўвагу месьцічаў павязанымі белымі хусьцінкамі і налепленымі чырвонымі сэрцайкамі на вопратцы і скронях.

Спачатку цікаўнасьць мінакоў выклікалі быццам бы бязмэтныя зімовыя гульні маладзёнаў. Але потым увесь гурт скіраваўся да зьлепленага вусатага сьнегавіка. "Ці можа моладзь галасаваць за кіраўніка, пры якім бясьсьледна зьнікаюць людзі?" - прагучала пытаньне. "Не, ён павінен зьнікнуць, як гэты сьнегавік". Пасьля гэтага снегавік быў закіданы сьняжкамі й быў разбураны.

А потым ля прыпынку грамадзкага транспарту на сьнезе быў зроблены зь літараў радок: "Сёньня - Ганчар, заўтра - ты!", а таксама подпіс "Зубар".

3 сакавіка ў Брэсьце на тралейбусным прыпынку "Цэнтральны" за расклейку налепак ЗУБРА былі затрыманыя непаўнагадовыя Аляксандар Стракач і Сяргей Журбіла. Падлеткі былі дастаўлены ва Ўпраўленьне міліцыі Маскоўскага раёну. У міліцыі быў праведзены кароткі допыт. Супрацоўнікі задавалі пытаньні: "Хто галоўны Зубар? Колькі вам плацяць?" А таксама абяцалі "пасадзіць на тры гады". Усё скончылася тым, што міліцыянты склалі пратакол канфіскацыі, а дзяцей выпусьцілі з бацькамі пад распіску.