Улады спрабуюць застрашыць ЗУБРа :: Хартыя'97 :: Навiны

Адзін з удзельнікаў акцыі новага руху супраціву ЗУБР быў прыгавораны ўвечар 6 сакавіка да 15 сутачнага арышту за пікет, што адбыўся напярэдадні ля рэзыдэнцыі Лукашэнкі. Шэсьць маладых людзей выказалі тады свой пратэст зьнікненьню ў Беларусі вядомых людзей. Трое зь іх былі затрыманыя й ўчора сталі перад судом Ленініскага раёну. У выніку Антон Цялежнікаў з Барысава быў прыгавораны да 15 сутак арышту. Андрэй Пятроў й Зьміцер Абрамовіч атрымалі штрафы па 20 мінімальных заробкаў (прыкладна 100 даляраў кожны).

Дзіўна, што прыгавор да заключэньня на 15 сутак быў вынесены Цялежнікаву, калі судзьдзя Жданок атрымаў інфармацыю пра тое, што ў гэты самы час ў цэнтры Менску праходзіць акцыя ЗУБРА з патрабаваньнем знайсьці зьніклых людзей. Па словах відавочцаў, у залю суда зайшоў нейкі міліцэйскі чын, які, даведаўшыся, што Пятроў і Абрамовіч "усяго толькі" аштрафаваныя, моцна раззлаваўся. Пасьля гэтага судзьдзі патэлефанавалі, і ён прыгаварыў Антона Цялежнікава да 15 сутак арышту.

Антон будзе адбываць арышт у спэцпрыёмніку-разьмеркавальніку на вуліцы Акрэсьціна. Адразу пасьля вынясеньня прыгавору Цялежнікаву была перададзена перадача. Сёньня ў Менск прыязджае ягоны брат, які таксама будзе кантактаваць з арыштаваным.

Сёньня на нашым сайце - фотарэпартаж з акцыі ЗУБРА.