"Интэграцыя": беларускія прадпрыемствы трываюць крызу праз расейскія :: Хартыя'97 :: Навiны

Гігант наваполацкай індустрыі - вытворчае аб`яднаньне "Палімір" перажывае сур`ёзную крызу. Яе асноўнай прадукцыяй, поліэтыленам, сёньня запоўненыя ўсе склады і таварныя вагоны, што стаяць на прызавоцкай чыгунцы. Праблема збыту прадукцыі ўзьнікла з-за таго, што айчынны спажывец ня ў стане набыць яе з-за адсутнасьці сродкаў, а спажыўцы блізкага й далёка замежжа, якія да сёньня з задавальненьнем бралі беларускі поліэтылен, пераключыліся на больш танную прадукцыю расейскай вытворчасьці.

Раней "Палімір" ня меў ніякіх клопатаў з рэалізацыяй сваёй прадукцыі. Поліэтылен карыстаўся попытам, як на ўнутраным рынку, так і за мяжою. Але з адраджэньнем вытворчасьці поліэтылена на Омскім нафтахімічным камбінаце і шэрагу іншых прадпрыемстваў, дзе сабекошт прадукцыі значна шырэй за нашу, беларуская прадукцыя ня вытрымала канкурэнцыі.

У Наваполацку ў сувязі з гэтым узьнікла прымаўка "Дзе пачынаецца рынак, там сканчваецца інтэграцыйная рыторыка". На аб`яднаньні ўведзены жорсткі рэжым эканоміі электраэнэргіі - адключаны нават лазьні, у якіх мыліся работнікі пасьля зьмены, але гэта, натуральна, не вырашае праблемы.

Ня меньш складанасьцей і з рэалізацыяй нітрона - штучнага валакна, малая частка якой ішла на патрабаваньні айчыннай лёгкай прамысловасьці. Зараз, калі лёгкая прамысловасьць ў занападзе, адпаведна ўзьніклі праблемы са збытам прадукцыі.

Дынаміку заняпаду згаданай галіны лёгка прасачыць на аб`ёмах нітрону, які пастаўляўся "Палімірам" на беларускія прадпрыемствы. Так, у 1998 годзе было пастаўлена 25 тысячаў тонаў валакну, у 1999 годзе - 17 тысячаў, у мінулым годзе - толькі 14, а за два месяцы гэтага году аб`ёмы паставак ў параўнаньні зь мінулым годам скараціліся ў тры разы.