ЗУБР зноў нагадвае Лукашэнку пра зьніклых у Беларусі вядомых людзях :: Хартыя'97 :: Навiны

ЗУБР правёў яшчэ адну арыгінальную акцыю. На гэты раз ён захапіў ўрадавую трасу. Абектам увагі "зубраў" стаў пяцісотмятровы, белы плот менскага заводу халадзільнікаў "Атлант". Уздоўж гэтага плоту па маршруце "Менск - Дразды" мінімум чатыры разы праязджае сам Аляксандар Рыгоравіч Лукашэнка.

І для таго, каб Лукашэнка не забываў пра свае злачынствы, шэсьць маладых людзей распісалі сьцены гэтага самага плоту надпісамі, якія ўтрымлівалі канкрэтныя пытаньні: "Дзе Юры Захаранка?", "Дзе Віктар Ганчар?", "Дзе Анатоль Красоўскі?", "Дзе Зьміцер Завацкі?". Надпісы ўражвалі: вялікія літары, напісаныя на сьценах аэразольнымі балончыкамі. Гэтыя пытаньні, што хвалюць грамадзкасьць павінны былі пабачыць не толькі Лукашэнка, але й маса іншых людзей, якія ці не ведаюць, ці наогул не задумваюцца пра лёс Захаранкі, Завацкага, Ганчара і Красоўскага.

Акцыя прайшла бяз эксцэсаў, бо працягвалася ўсяго толькі некалькі хвілінаў. Усе пасьпяхова пакінулі ўрадавую трысу. Але праз паўгадзіны (!) усе надпісы былі замаляваныя пульвелізатарамі, бо да паездкі Лукашэнкі заставаліся лічаныя хвіліны…Але, як бы там не было памагатыя Лукашэнкі не стараліся зьберагчы апетыт свайго гаспадара ад хваравітых пытаньняў, апетыт усё ж такі быў сапсаваны. Яму не маглі не паведаміць пра кароткую акцыю ЗУБРА, што нарабіла шмат шуму.