Нямеччына не выключае магчымасьці зьяўленьня жалезнай заслоны паміж Эўропаю й Беларусьсю :: Хартыя'97 :: Навiны

"Нямеччыне надакучыла аказваць Беларусі дапамогу, якая заключаецца ў адпраўцы гуманітарных грузаў", - заявіў нямецкі грамадзкі грамадзкі лідар Фрэд Дорн падчас свайго візыту ў Беларусь, - "такая дапамога не прадуктыўная і не мае перспектывы". Да такіх катэгарычных высноваў ён прыйшоў пасьля асабістага вопыту супрацоўніцтва зь беларускімі ўладамі, якія, па ягоных словах, настроены не на супрацоўніцтва, а на канфрантацыю.

Фрэд Дорн, супрацоўнік Царкоўнага інстытуту эвангельскай абшчыны Гесэн-Насаў (землі Гесэн і Рэйнланд-Пфальц, Нямеччына) упершыню прыехаў у Беларусь у 1988 годзе ў складзе групы "Палітычнае паломніцтва", якая складалася са 150 жахароў Нямеччыны. "Мы хацелі прыняць удзел у лёсах жыхароў краіны, якая адпакутавала ў гады другой сусьветнвй вайны ад нацызму", - заўважыў сп. Дорн. Па выніках гэтага візыту група былых беларускіх остэрбайтэраў атрымала магчымасьць наведаць Нямеччыну. Сумесна зь беларускім рэспубліканскім фодам "Узаемаразуменьне і прымірэньне" прадстаўнікі "Палітычнага паломніцтва" займаліся стварэньнем спэцыяльных аптэкаў для ахвяраў нацызму ў Менску і Віцебску. Ужо на наступны год немцы адгукнуліся на прапанову беларускіх уладаў аказаць дапамогу насельніцтву, якое пацярпеў ад чарнобыльскай катастрофы.

Разам з тым, па словах сп. Дорна многія ў Нямеччыне "ужо стаміліся" аказваць беларусам дапамогу, якая заключаецца ў адпраўленьні гуманітарных грузаў і прыняцьці беларускіх дзяцей на аздараўленьне. Паводле ягоных словаў, аптымальным варыянтам можа быць гуманітарнае супрацоўніцтва па стварэньні асноваў грамадзкай супольнасьці ў краіне. "Мы павінны больш даведацца адзін пра аднаго, з тым, каб пабудаваць адзіную, мірную і квітнеючую Эўропу, заявіў сп.Дорн. - А для рэалізацыі гэтых мэтаў неабходна супрацоўнічаць з грамадзкімі арганізацыямі, бо беларускія ўлады настроены на канфрантацыю. Неабходна супрацоўнічаць такім чынам, каб не дапусьціць узьнікненьня жалезнай заслоны паміж Эўропаю й Беларусьсю".