Зарэгістраванаы першы ў гэтым годзе выпадак шаленства :: Хартыя'97 :: Навiны

У Беларусі зарэгістраваны першы сёлета выпадак захворваньня на шаленства сярод буйной рагатай жывёлы. Варта адзначыць, што размова ідзе не пра захворваньне губчатай энцэфалапатыяй, якое таксама называюць "каровіным шаленствам". Мяркуецца, што шаленства было выклікана ўкусам дзікай жывёлы.

Як паведаміў БелаПАН галоўны ветэрынарны інспэктар Міністэрства сельскай гаспадаркі і харчаваньня Беларусі Аляксандр Аксёнаў, захворваньне шаленствам было зафіксавана яшчэ ў лютым у адной з кароў у вёсцы Даўлюдаўшчына Шчучынскага раёну Гродзенскай вобласьці. Жывёла трапіла пад падазрэньне пасьля таго, як адмовілася ад прыёму корму. Карова была забіта, а пастаўлены дыягназ пацьвердзіўся.

Паводле словаў Аксёнава, выпадкі захворваньня на шаленства сярод буйной рагатай жывёлы ў Беларусі даволі рэдкія: летась іх было зарэгістравана ўсяго восем. Асноўная небясьпека ў пераносе гэтага захворваньня зыходзіць ад дзікіх жывёлаў, міграцыю якіх, асабліва ўвясну, прасачыць даволі складана. Тым ня меньш, пэўныя меры па недапушчэньню распаўсюджваньня такога кшталту шаленства прадпрымаюцца. У прыватнасьці, на вялікіх плошчах раскідваюцца спэцыяльныя прынады для вакцынацыі дзікіх жывёлаў: ліс, ваўкоў і г.д.

Як падкрэсьліў Аксёнаў, выпадкаў захворваньня буйной рагатай жывёлы губчатым энцэфалітам у Беларусі пакуль зарэгістравана не было.