Нявыбранныя "дэпутаты" галадаюць супраць падману :: Хартыя'97 :: Навiны

Скандалям скончылася 22 сакавіка паседжаньне Цэнтральнай камісіі Рэспублікі Беларусь па выбарах і правядзеньні рэспубліканскіх рэферэндумаў, на якім падводзіліся вынікі першага тура паўторных "выбараў" в "палату прадстаўнікоў". Трое кандыдатаў - Алег Мазго, Юры Васкрасенскі і Васіль Сільчук, якія балатаваліся па выбарчай акрузе № 105 горада Менску, ў самой залі паседжаньня аб`явілі галадоўку.

Незадаволенасьць кандыдатаў выклікана адмаўленьнем Цэнтральнай камісіі задаволіць іх скаргу аб адмене вынікаў галасаваньня па 105-й акрузе. Паводле зьвестак ЦВК, перамогу ў гэтай акрузе ўжо ў першым туры выбараў атрымала выкладчык Менскага дзяржаўнага педагагічнага універсітэту Надзея Цыркун, якая нібыта набрала 54 адсоткі галасоў выбаршчыкаў. Аднак яе апаненты лічаць, што падчас правядзеньня галасаваньня было дапушчана масавае парушэньне выбарчага заканадаўства. Пасьля разгляду іхняй скаргі, Цэнтральная камісія палічыла прадстаўленыя ёй доказы фальсыфікацыі выбараў неверагоднымі і зацьвердзіла пратакол галасаваньня акругавай камісіі.

Пасьля таго, як кандыдаты аб`явілі аб пачатку галадоўкі, члены Цэнтральнай камісіі змушаны былі пакінуць залю паседжаньня і працягнуць яго ў іншым месцы. Супрацоўнікі аховы прапанавалі кандыдатам пакінуць памяшканьне і праводзіць акцыю пратэсту ў іншым месцы. Яны патлумачылі гэта тым, што Дом ураду, дзе праходзіла пасяджэньне ЦВК, зьяўляецца ахоўваемым аб`ектам. Галадаючыя, аднак, адмовіліся пакінуць памяшканьне.

Пасьля гэтага супрацоўнікі аховы прапанавалі журналісту БелаПАН - адзінаму прадстаўніку СМІ на пасяджэньні - пакінуць залю і пачакаць кандыдатаў у фае. Праз некаторы час супрацоўнік службы аховы паведаміў, што ўсе кандыдаты добраахвотна пакінулі Дом ураду.