"МАКДОНАЛЬДС" ПАЗБАЎЛЯЕЦЦА ПРАВА АРЭНДЫ ЗЯМЕЛЬНАГА ЎЧАСТКА Ў РАЁНЕ ЧЫГУНАЧНАГА ВАКЗАЛА Ў МЕНСКУ :: Хартыя'97 :: Навiны

Менскі гарвыканкам прыняў рашэньне забраць учатак зямлі, перададзены ў арэнду замежнаму прадпрыемству "Рэстараны МакДональдс" пад будаўніцтва і эксплуатацыю рэстарацыі тэрмінам на 39 гадоў, і перадаць яго ў сталае валоданьне Беларускага дзяржаўнага унівэрсытэта. Пра гэта БелаПАН паведаміла мэнэджэр па сувязях з грамадзкасьцю ЗП "Рэстараны МакДональдс" Вольга Траян.

Паводле ейных словаў, такое рашэньне было прынята менскімі ўладамі яшчэ ў канцы студзеня, аднак "Макдональдсу" паведамілі толькі праз некалькі тыдняў. Тлумачыцца рашэньне тым, што на ўчастку, які раней быў перададзены ў арэнду "Макдональдс", улады запланавалі пабудаваць новы корпус БДУ і разьмесьціць у ім факультэт міжнародных зносінаў. Якім чынам мяркуецца ў архітэктурным і будаўнічым пляне ажыцьцявіць гэты праэкт, пакуль дакладна невядома. Аднак, як зазначыла Вольга Траян, паводле зьвестак, якія маюцца ў кампаніі, гэта будзе 14-павярховы будынак, які разьмесціцца перад фасадам рэстарацыі і фактычна закрые яго.

У "Макдональдс" расчараваныя рашэньнем уладаў, паколькі ў кожнай краіне кампанія прытрымліваецца мясцовага заканадаўства і не парушае ўмоваў дагавору арэнды зямлі. Як паведаміла Вольга Траян, кампанія не зьбіраецца мірыцца з пазбаўленьнем права арэнды і ўжо адправіла лісты ў органы дзяржаўнага кіраваньня, аднак да сёньняшняга дня прапановаў аб сустрэчы і правядзеньні перамоваў з боку ўладаў не паступала. Па словах Траян, на дадзены момант дагавор арэнды яшчэ не скасаваны. Для таго каб гэта зрабіць, неабходна выканаць шэраг юрыдычных працэдураў, выкладзеных у Зямельным кодэксе і законе аб замежных інвестыцыях, "што не так проста".

Варта зазначыць, што рэстаран на вакзале карыстаецца асаблівай папулярнасьцю не толькі ў менчукоў, але і ў гасцей сталіцы, паколькі зьяўляецца практычна адзіным прадпрыемствам хуткага абслугоўваньня на Прывакзальнай плошчы. З дня свайго адкрыцьця ў кастрычніку 1997 года рэстарацыя абслужыла больш за 3,5 мільёны наведвальнікаў. Ён налічвае 117 работнікаў і 20 чалавек офіснага персаналу. У гэтым жа будынку ў кампаніі арандуюць плошчы пад офісныя памяшканьні прадстаўніцтвы шэрагу замежных кампаніяў.

Цяперашнім часам у Менску дзейнічаюць 6 рэстарацый хуткага харчаваньня "Макдональдс". Агульны аб`ём інвестыцыяў кампаніі складае больш за 14 мільёнаў даляраў ЗША. На пытаньне, як дадзенае рашэньне паўплывае на далейшыя планы "Макдональдс" па інвесціраваньню ў Беларусь, у кампаніі адказваюць, што ўсё будзе залежыць ад таго, ці знойдуць бакі кампраміс пры ўрэгуляваньні згаданага пытаньня.