Думай! Вырашай! Дзейнічай! :: Хартыя'97 :: Навiны

Зубр правёў 23 сакавіка сэрыйную акцыю ў самых прэстыжных ВНУ Менску. У студэнцкіх аўдыторых раскідваліся ўлёткі з пытаньнем "Хто адкажа за зьніклых людзей?" і заклікам "Думай!Вырашай! Дзейнічай!". Гэта была самая сапраўдная атака на alma mater. "Зубры" займалі самыя шматлюдныя аўдыторыі, нягледзячы на зьбянтэжаныя пратэсты выкладчыкаў, зачытывалі такім, як самі, студэнтам тэкст улёткі і пасьля раскідвалі іх сярод уражаных і ўзбуджаных незвычайнай сытуацыяй маладых людзей. Акцыі прайшлі ў Беларускім дзяржаўным унівэрсытэце, Беларускім дзяржаўным эканамічным унівэрсытэце, Беларускім унівэрсытэце інфарматыкі і радыёэлектронікі, Беларускім педагагічным унівэрсытэце імя М.Танка і ў Лінгвістычным унівэрсытэце. У кожным унівэрсітэце было распаўсюджана па тысячы, а то і болей улётак.

Напрыклад, у БДУРы і БДУ "пад раздачу" трапіла па 5 аўдыторыяў, у БДЭУ - ажно дзесяць. У кожнай з аўдыторыяў на лекцыях прысутнічала ад 70 да 100 студэнтаў.

Калі ў былых РТІ і "наргасе" ўлёткі распаўсюджваліся на лекцыях, то ў педунівэрсытэце яны былі скінутыя з балькону фае, калі ў час паміж зьменамі там сабралася каля тысячы студэнтаў гэтай навучальнай установы.

Улёткі нагадвалі будучаму "цьвету нацыі" пра зьніклых бяз зьвестак Юры Захаранку, Зьміцера Завацкага, Віктара Ганчара і Анатоля Красоўскага. "Хто адкажа за зьніклых людзей?" - крычалі вялікія літары над іхнімі здымкамі.

Ва ўлётцы было напісана:

"ДУМАЙ!

У якой Беларусі ты хацеў бы жыць?

У той, дзе зьнікаюць людзі?

У той, дзе ўлада знаходзіцца ў руках аднаго чалавека, які не ўсьвядамляе сваіх учынкаў?

У той дзе ты не можаш знайсьці прымяненьня сваім ведам?

У той, дзе моладзь адпраўляюць па разьмеркаваньню ў Чарнобыльскую зону?

У той, дзе вар`яцкая ўлада вырашае якую музыку табе слухаць і якія фільмы глядзець?

У той, якая не мае будучыні?

ВЫРАШАЙ!

Ты абавязаны рашыць, як жыць далей.

Поўзаць перад нядбайнай уладаю

або дыктаваць ёй сваю волю.

Пагарджаць сябе за маладушша

ці хадзіць з горда паднятай галавой.

Спадзявацца на пасыўных і бязвольных палітыкаў

ці браць на сябе адказнасьць за будучыню краіны.

Чакаць, калі хтосьці ўсё вырашыць за цябе

ці прымаць рашэньні самому.

Існаваць ці Жыць.

ДЗЕЙНІЧАЙ!

калі ты хочаш Жыць, а не існаваць - дзейнічай.

Будзь свабодным - наш праціўнік раб сваіх слабасьцяў.

Будзь мужным - наш праціўнік бязвольны баязьлівец.

Будзь сумленным - наш праціўнік хлусьлівы і амаральны.

Будзь моцным - наш праціўнік разгублены.

БУДЗЬ ЗУБРАМ!