Уладзімер Кудзінаў выступае ў Жэневе :: Хартыя'97 :: Навiны

Канферэнцыя пад эгідай камісіі па правох чалавека ААН адбываецца сёньня ў Жэневе. Ейныя ўдзельнікі абмяркоўваюць сытуацыю з правамі чалавека ў Беларусі, Судане і на Кубе. На канферэнцыі выступіць з даклядам былы палітвязень і дэпутат Вярхоўнага Савету 13 скліканьня Ўладзімер Кудзінаў, які мае намер падрабязна раскрыць тэму зьнікненьня палітычных апанентаў беларускага рэжыму - Юры Захаранкі, Віктара Ганчара, Анатоля Красоўскага і Зьміцера Завацкага.

Згодна запрашэньню, што было накіраванае да Кудзінава, мэта мерапрыемства - павысіць інтарэс міжнароднай супольнасьці да праблемаў парушэньняў правоў чалавека ў згаданых краінах шляхам прыцягненьня ўвагі непасрэдна да ахвяраў палітычных перасьледаў.

Таму варта нагадаць, што Ўладзімер Кудзінаў, абвінавачаны ў дачы хабару, знаходзіўся ў няволі чатыры гады і быў вызвалены два месяцы таму. Дэпутат не сумняваецца ў тым, што рэальнаю прычынаю арышту стала ягоная апазыцыйная дзейнасьць, у прыватнасьці - удзел у кампаніі аб`яўленьня імпечменту Лукашэнку падчас канстытуцыйнай крызы ў лістападзе 1996 года.

Хартыя-97 падрыхтавала для Ўладзімера Кудзінава хроніку парушэньняў правоў чалавека ў Беларусі за апошнія тры месяцы, якую ён таксама прадставіць канферэнцыі па правам чалавека ААН.