Зубра прызналі невіноўным :: Хартыя'97 :: Навiны

Суд Ленінскага раёну Менску прызнаў удзельніка руху ЗУБР Аляксандра Атрошчанкава, што быў абвінавачаны ў непадпарадкаванасьці супрацоўнікам праваахоўчых ворганаў, невіноўным. Хлопец быў затрыманы супрацоўнікамі міліцыі падчас матчу "Беларусь - Нарвегія" толькі за тое, што патрабаваў вярнуць яму бяспрэцэндэнтна сарваную міліцыянтамі значку з лягатыпам ЗУБРа.

Нагадаем, што з-за таго, што падчас матчу "Беларусь - Нарвегія" на стадыёне знаходзіўся Аляксандар Лукашэнка, міліцыя рабіла бяспрэцэндэнтныя падыходы да таго, каб на трыбунах стадыёну не зьявіліся бел-чырвона-белыя нацыянальныя сьцягі. Шасьцёх членаў Маладога Фронту затрымалі за распаўсюд улётак і антыпрэзыдэнцкіх лёзунгаў. Затрымалі й чацьвярох удзельнікаў руху ЗУБР, у якіх адабралі сьцягі й значкі з лягатыпам ЗУБРа.

Затрыманых даставілі ў Ленінскі РАУС Менску. Дзевяцёх хутка адпусьцілі, а дзесятаму, Аляксандру Атрошчанкаву, давялося начаваць ва ўчастку. У яго на футбольным матчы адбыўся канфлікт з адным з пьяных балельшчыкаў, які праз павышанае ўтрыманьне ў крыві алькаголю стаў празьмерна чульлівым да касавурых позіркаў. І хаця, па словах сьведкаў, канфлікт ініцыянаваў зусім не Атрошчанкаў, у міліцэйскім пратаколе менавіта ён абвінавачаны ў хуліганстве. Яго абвінавацілі ў парушэньні арт.156 КаАП (дробнае хуліганства) і на раніцу ўручылі позву ў суд на 6 красавіка. Па словах Аляксандра Атрошчанкава, ва ўчастку яго зьбівалі супрацоўнікі праваахоўчых ворганаў.

Суд над ім адбыўся 6 красавіка, але праз хадайніцтва адваката аб прыцягненьні да суду дадатковых сьведкаў, быў працягнуты 10 красавіка. Нягледзячы на тое, што міліцыянты, што выступалі ў якасьці сьведкаў, як і трэба было чакаць, судзьдзя Церашкова прызнала Аляксандра Атрошчанкава невіноўным.