Забаранілі ўвоз мяса з Эўропы :: Хартыя'97 :: Навiны

Беларускія ўлады забаранілі ўвоз з Эўропы ўсіх відаў жывёлаў і птушак, прадуктаў забою, перапрацоўкі малака й сыравіны, атрыманага ад жывёлаў і птушак. Гэтая забарона накіравана на недапушчэньне заносу на тэрыторыю Беларусі яшчура і іншых інфекцыйных захворваньняў, небясьпечных як для жывёлаў, так і для чалавека.

Гэтым дакумантам таксама забаронены ўвоз у рэспубліку зь небясьпечных у сувязі з яшчурам дзяржаваў каўбасных вырабаў, мясных кансэрваў і кармоў, якія ўтрымліваюць бялкі жывёльнага паходжаньня, без узгадненьня з упаўнаважанымі ветэрынарнымі службамі. Акрамя гэтага, забаронена выкарыстоўваць для корму жывёлаў кармы жывёльнага паходжаньня незалежна ад месца іх вытворчасьці, акрамя тых, што атрыманы ад перапрацоўкі малака і рыбы, а таксама тлушчу, выпрацаванага на беларускіх прадпрыемствах. Згодна з пастановаю, усе аўтадарожныя пункты пропуску цераз дзяржаўную мяжу Беларусі павінны быць абсталяваны дэзынфекцыйнымі бар`ерамі, а пропуск аўтатранспартных сродкаў, што ўязджаюць у Беларусь, павінен ажыцьцяўляцца толькі праз праходжаньне такога бар`еру. У красавіку-чэрвені для закупкі сродкаў дэзынфекцыі Міністэрства фінансаў выдзеліць 100 мільёнаў рублёў (76 тысячаў даляраў ЗША).