Лукашэнка "решительно" пераўзбройвае армію пры ўдзеле Расеі :: Хартыя'97 :: Навiны

Расейская ваенная дэлегацыя, якую ўзначальвае міністар абароны Сяргей Іваноў прыбывае сёньня ў Менск для ўдзелу ў паседжаньні Сумеснай калегіі ваенных ведамстваў дзьвюх краінаў. Расейскі міністар мае намер сустрэцца з дзяржсакратаром Савету бясьпекі Уралам Латыпавым. Заўтра Іваноў зьбіраецца перамовіцца пра штосьці звышсакрэтнае зь беларускім калегам Леанідам Мальцавым - размова будзе выключна канфідэнцыяльнай.

Меў жаданьне Іваноў сустрэцца з Лукашэнкам, але той у дзень прыезда міністра выляцеў у Сьвярдлоўскую вобласьць, дзе мае намер падпісаць некалькі пагадненьняў, што датычаць пераўзбраеньня беларускай арміі.

Гэта першы візыт Аляксандра Лукашэнкі на Урал. Разам зь ім у Экацерынбург паляцела амаль уся ягоная сьвіта. Візыт, па словах пасла ў Расеі Ўладзімера Грыгор`ева, перш за ўсё, зьвязаны з пераўзбраеньнем. Грыгор`еў кажа, што ў хуткім часе ўся беларуская армія будзе мець самую сучасную зброю, і на дадзены момант на гэта шукаюцца сродкі. Сродкі, трэба разумець, будуць "адшуквацца" ў губернатара вобласьці Эдуарда Росэля і паўнамоцнага прадстаўніка прэзыдэнта ва Ўральскім федэральным окрузе Петра Латышава, зь якімі Лукашэнака мае намер сустракацца.

"Мы решительно свою армию перевооружаем, пусть знают об этом, и дипломаты здесь присутствуют, я вам прямо говорю, что мы свою армию сделаем настоящей современной армией, мы на это изыскиваем средства. И в связи с этим, конечно же, сотрудничество самое непосредственное и плотное", -- заявіў пасол.