Усенародныя выбраньнікі ці падстаўныя марыянэткі? :: Хартыя'97 :: Навiны

Восемдзесят рабочых магілёўскага прадпрыемства ААТ "Будтрэст" перадалі ў пракуратуру Цэнтральнага раёну гораду скаргу, у якой указваецца на грубыя парушэньні на сходах у працоўных калектывах па вылучэньню дэлегатаў на Ўсебеларускі зьезд, што ладзяць улады. Рабочыя маюць намер накіраваць Лукашэнку заяву аб магчымым непрызнаньні вынікаў зьезду.

У Магілёўскай вобласьці на гарадзкі сход, на якім будуць адбірацца дэлегаты на Ўсебеларускі народны сход, будуць адпраўлены 390 прадстаўнікоў працоўных калектываў, у тым ліку 105 ад абласнога цэнтру. Гарадзкія ўлады сьцьвярджаюць, што сходы працоўных калектываў прайшлі паўсюль і сумленным галасаваньнем былі вызначаны ўпаўнаважаныя.

З гэтым катэгарычна нязгодны восемдзясят рабочых ААТ "Будтрэст №12". Яны маюць на тое рэзонную падставу - ніводнага рабочага ў лік упаўнаважаных ад трэсту не трапіла. Рабочыя, незадаволеныя сваім сацыяльна-эканамічным становішчам, нізкім узроўнем заробку, імкнуцца трапіць на гэты агульнанацыянальны форум, каб гучна заявіць пра сваю незадаволенасьць. Але іх туды не пускаюць.

Пра незадаволенасьць рабочых кіраўніцтву вобласьці й гораду вядома, але рэакцыі, аднак, ад іх ніякай не было. Прыкладна такім самым чынам прайшлі сходы і ў іншых калектывах. З адной толькі розьніцай, што працуюць там меньш актыўныя і ініцыятыўныя людзі, таму непарадку і незадаволенасьці не было. Большасьць насельніцтва да надыходзячай "тусоўкі" на высокім узроўні адносяцца скептычна, бо ўпэўненыя ў тым, што гэта толькі чарговая спроба акуляраўціральніцтва. Рэаліі жыцьця больш відавочна за ўсялякія прамовы даказваюць неадпавядальнасьць сёньняшняй улады.