Расейскія СМІ ўспомнілі пра мазаічную псыхапатыю беларускага лідэра :: Хартыя'97 :: Навiны

Калі шчыра, ня ведаю, ці мае Лукашэнка спічрайтэр, ці ўсю сваю эксцэнтрыку ён выдае самастойна. Калі такі ўсё ж такі ёсьць, то ён як і бацька, павінен мець дыягназ "памяркоўна выражаная мазаічная псыхапатыя з перавагаю рысаў паранаідальнага й дысацыяльнага разладу асобы".

Вяртаючыся з Экацерынбурга, дзе сумесна з губернатарам Росэлям было заплянавана мноства двухбаковых карысных прамысловых праэктаў, Лукашэнка выкінуў такі ля трапу самалёту чарговую порцыю нетрывіяльнай рыторыкі: "Я считаю никуда не годной систему власти в России. У вас же все избираются, все независимые и вряд ли будут хорошо работать".

Ну сказааў і сказаў. Не такое яшчэ казаў. Але чаго тут жахацца? Ну… памяркоўная мазаічная псыхапатыя. Ці толькі ўчора гэта высьветлілася? Не тады, калі, напрыклад, год таму Лукашэнка аб`явіў на ўвесь сьвет ад стварэньні на заходняй мяжы 300-тысячнай арміі, якая будзе пагражаць НАТА? А праз два месяцы паведаміў аб скарачэньні арміі з-за недахопу грошай. Хіба не заўважалі за ім некаторых дзівацтваў, калі прапрацоўвалася пытаньне стварэньня Саюзу Беларусі й Расеі?

У гэтым сэнсе заява інтэрфаксаўскай крыніцы пра тое, што Крэмль "схілен разглядаць словы беларускага лідэра як непаразуменьне", гучаць неяк дзіўна, як і прамовы самаго аратара. Хіба можна патрабаваць ад чалавека з такім дыягназам, каб ён прамаўляў адэкватныя словы? Сказаў. Яшчэ што-небудзь скажа. Абсалютна супрацьлеглае. "Есть единственный путь к власти -- это выборы. Власть надо получать из рук своего народа", -- гэта таксама казаў Лукашэнка. Але ён, напэўна, па прычыне дыягназу гэтага ўжо не памятае.

Часам, вядома, ягоныя выказваньні абсалютна бязкрыўдныя. Напрыклад, 22 лютага павіншаваў амэрыканскага амбасадара ў Менску з надыходзячым Днём Савецкай арміі, а 16 красавіка параўнаў Вялікдзень з Днём Перамогі. А часам вось правакуюць міжнародныя скандалі. Гэта як пашанцуе.