"Белнафтахім" патрабаваў ад банкаў 18 мільёнаў даляраў :: Хартыя'97 :: Навiны

У сувязі з затрымкаю аплаты пастаўленых нафтапрадуктаў дэфіцыт зваротных сродкаў канцэрну "Белнафтахім" у наступным месяцы складзе 18 мільёнаў даляраў ЗША. Пра гэта паведаміў прэзыдэнт канцэрну Іван Бамбіза 19 красавіка, у выступе на рэспубліканскай сэлектарнай нарадзе, прысьвечанай ходу вяcновых палявых працаў, паведамляе БелаПАН. Бамбіза зьвярнуўся з просьбаю да Нацыянальнага банка і камэрцыйных банкаў выдзеліць крэдыт для закупкі нафтапрадуктаў на гэтую суму (150 тысячаў тонаў), каб забясьпечыць пастаўкі паліва для летняга цыклу сельскагаспадарчых працаў.

Па інфармацыі прэзыдэнта канцэрну, у краіне ёсьць месячны запас бензіну і дызпаліва для забесьпячэньня патрэбаў эканамікі. Аднак праз складанае становішча сельскагаспадарчых прадпрыемстваў пастаўкі паліва ўскладнены.

На пытаньне Аляксандар Лукашэнкі, колькі канцэрн ахвяраваў паліва сялу (пры гэтым ён прывёў у прыклад Беларускую чыгунку, што бясплатна адгрузіла 10 тысячаў тон дызпаліва), Бамбіза адказаў: "Сельхозпотребители имеют задолженность перед нашими предприятиями. Это и есть жертва. Мы дали в долг 8 миллиардов товарного кредита и еще не знаем, когда эти деньги вернутся. Списать я это не могу. У нас для пожертвований средств нет". Па словах прэзыдэнта канцэрну, на ўнутраным рынку нафтапрадукты рэалізуюцца па стратных коштах, яны "не толькі таннныя, а нават супертанныя", і "толькі за кошт экспарту гэта некалькі кампенсуюцца, таму асаблівых даходаў на беларускім рынку перапрацоўкі нафты няма".

Нагадаем, што "выбіваньне" грошай з камэрцыйных банкаў ёсьць простае парушэньне дамоўленасьці зь Міжнародным Валютным Фондам.