У Менску новая хваля рэпрэсыяў :: Хартыя'97 :: Навiны

Учора падчас акцыі ЗУБРа "Канчатковы дыягназ" было затрымана больш за 35 чалавек. Палова зь іх - непаўнагадовыя й журналісты - былі адпушчаныя толькі к тром гадзінаў ночы. Адну з вызваленых дзяўчын адразу забрала "хуткая дапамога" і паставіла дыягназ "лёгкае страсеньне мазгоў" - дзяўчыну зьбіў лейтынант міліцыі. Непаўнагадовыя выходзілі з сінякамі - АМАП зьбіваў іх адразу ў аўтобусах па дарозе ў РАУС. Цяжарную ўдзельніцу акцыі пратрымалі ў міліцыі больш за 7 гадзінаў і выпусьцілі толькі толькі тады, калі тая амаль губляла прытомнасьць. Яшчэ 16 чалавек былі пакінутыя на трое сутак у спэцпрыёмніку - разьмеркавальніку на Акрэсьціна.

Першымі адпусьцілі журналістаў. Адбылося гэтта каля 23.00, журналістаў радыё "Рацыя" Віктара Мухіна й Тацяну Емяльянаву, карэспандэнта газэты "Наша ніва" Тацяну Сьнітко адпусьцілі толькі праз 4 гадзіны пасьля затрыманьня з парушэньнем усталяванага законам парадку ўтрыманьня пад вартаю для разьбіральніцтва не больш чым на 2 гадзіны. Пазаштатных карэспандэнтаў "Нашай свабоды" Віталя Рымашэўскага адпусьцілі толькі ў 2 гадзіны ночы. Яшчэ адной пазаштатнай карэспандэнтцы Настасьсі Чэрнік уручылі позву ў суд на 25 красавіка за парушэньне артыкулу 167 КоАП ч.1 (парушэньне парадку арганізацыі й правядзеньня сходаў, мітынгаў, вулічных шэсьцяў і дэманстрацыяў).

Такія самыя позвы пасьля 5 гадінаў затрыманьня былі ўручаны яшчэ траім дзяўчынам - Кацярыне Шабан, Тацяне Кучко і Вользе Бурай. Да 2 гадзінаў начы была адпушчана пенсыянэрка Ірына Паўлючэнка, якой таксама ўручылі позву ў суд на 25 красавіка за парушэньне таго самага артыкулу 167.ч.1. Ейная сяброўка 65-гадовая пенсыянэрка Данілова, засталася ў спэцпрыёмніку-разьмеркавальніку на трое сутак.

Трэба адзначыць, што сярод 16 пакінутых на трое сутак у спэцпрыёмніку хопцаў - тры дзяўчыны (Ірына Тоўсьцік, Тацяна Марозава й Дар`я Раткевіч) і хворы на парок сэрца Яўген Афнагель.