"Чарнобыльскі шлях - 2001" прамая трансляцыя ў інтэрнэт на сайце Хартыі`97 :: Хартыя'97 :: Навiны

"Чарнобыльскі шлях-2001" адбудзецца ў Менску 26 красавіка. Арганізатар акцыі, аргкамітэт "Чарнобыльскага шляху-2001", плянуе сабраць удзельнікаў акцыі ў 17.00 на плошчы Волі, дзе напрацягу гадзіны павінен прайсьці малебен у памяць ахвяраў чарнобыльскай катастрофы. Пасьля гэтага, плянуецца шэсьце па вуліцы Леніна, праспэкту Скарыны да плошчы Незалежнасьці, дзе ўдзельнікі акцыі плянуюць перадаць у Дом ураду петыцыю аб праблемах, выкліканых аварыяй на Чарнобыльскай АЭС.

Першапачаткова члены аргкамітэту мерапрыемства былі настроеныя не падаваць заяўкі. Аднак на паседжаньні Каардынацыйнай рады дэмакратычных сілаў, што адбылася 10 красавіка, было вырашана падаць заяўку з просьбаю дазволіць 26 красавіка з 17.00 да 19.00 правядзеньне ў Менску шэрагу мерапрыемстваў. Менгарвыканакам дазволіў акцыю, але як заўсёды, на ўскрайку горада, на плошчы Бангалор. Арганізатары катэгарычна адмовілі йсьці на задворкі горада і праводзіць мітынг у парку Дружбы народаў, прызначыўшы месца збору ў першапачаткова заплянаваным месцы - на плошчы Волі.

У гэты дзень у Менску пройдзе не адна акцыя, прымеркаваная да гадавіны чарнобыльскай катастрофы. Кансэрватыўна-хрысьціянская партыя БНФ мае намер правесьці асабістае мерапрыемтсва ў 17.30 на плошчы Незалежнасьці.

26 красавіка, пачынаючы з 16 гадзінаў па менскім часе, прэсавы цэнтар Хартыі пачне асьвятляць ход жалобных мерапрыемстваў, якія адбудуцца на менскіх вуліцах. Заставайцеся з намі.