Дыягназ падцьвердзіўся: асудзілі 25 зубраў :: Хартыя'97 :: Навiны

Суды над 25 удзельнікамі акцыі ЗУБРа "Канчатковы дыягназ" прайшлі сёньня ў Менску. 16 чалавек прыехалі ў суд Партызанскага раёну Менску адразу са спэцпрыёмніку-разьмеркавальніка, куды яны былі пасаджаныя на трое сутак пасьля затрыманьня 21 красавіка ў парку імя Горкага. Зпакутаваных і без таго за гэтыя тры дні хлопцаў міліцыя яшчэ каля трох гадзінаў трымала ў аўтазаку ля будынку суда. Нягледзячы на тое, што ў машыне было цесна й душна, хлопцы ў знак пратэсту топалі нагамі і гучна сьпявалі "Мы партызаны, лясныя браты!"

Усе затрыманыя 21 красавіка людзі абвінавачваліся ў парушэньні артыкулу 167 ч.1 КаАП (парушэньне парадку арганізацыі й правядзеньня сходаў). 14 зубраў, якія прыехалі ў залю суда з Акрэсьціна, былі прыгавораныя да трох сутак арышту, але паколькі трое сутак яны ўжо адседзелі ў спэцпрыёмніку-разьмеркавальніку, то былі вызваленыя. Суды над астатнімі двума зубрамі перанесеныя: над Яўгенам Афнагелем i Анатолем Жэрбiным на 7 траўня, над Сяргеям П`яных на 3 траўня.

Арцюшкевіч Дзяніс і Сяляўка Антон, што скокнулі падчас акцыі на лыжах у Сьвіслач, былі прыгавораныя да штрафу ў памеры 20 мінімальных зарплатаў кожнаму (85 даляраў ЗША).

Затрыманыя ў той дзень дзяўчыны (Вольга Бурая, Тацяна кучко, Настасься Чэрнік і Кацярына Шабан) атрымалі папярэджаньне. Ірына Тоўсьцік і Дар`я Раткевіч былі таксама прыгавораныя да трох сутак арышту з улікам тых сутак, што яны адседзілі.