Інфармацыя аб арышце заходняга шпіёна можа быць "вуткай" :: Хартыя'97 :: Навiны

Інфармацыя аб затрыманьні 18 красавіка ў Менску замежнага грамадзяніна з доказамі злачынства пры атрыманьні сакрэтных дакумэнтаў можа быць выдумкай, заявіў БелаПАН 23 красавіка акрэдытаваны ў Беларусі заходні дыплямат, які пажадаў захаваць ананімнасьць.

Аб гэтым затрыманьнi 19 красавіка паведамiў Цэнтр інфармацыі й грамадзкіх сувязяў КДБ Беларусі, сьцьвярджаючы, што замежнік займаўся вярбоўкай беларускіх грамадзянаў і зборам разведвальнай інфармацыі. Затрыманы, чыё грамадзянства спэцслужбы не назвалі, бо "не імкнуцца ўскладніць адносіны Беларусі з гэтай краінай", быў нібыта зьмешчаны ў сьледчы ізалятар КДБ.

Аднак, паводле словаў дыплямата, ягоная амбасада кантактавала зь іншымі замежнымі амбасадамі ў Беларусі, і ніводнае зь іх не мела інфармацыі аб затрыманьні сваіх грамадзянаў. Тое ж самае паведамілі БелаПАН з шэрагу іншых інфармаваных крыніцаў. Яны дапускаюць, што нейкая з амбасадаў утойвае інфармацыю аб затрыманьні свайго грамадзяніна, ці тое, што быў затрыманы грамадзянін краіны, якая не мае амбасады ў Менску. "У той жа час я не зьдзіўлюся, калі гэта выдумка беларускіх уладаў," -- заявіў заходні дыплямат.

Паводле словаў прастаўніка аднаго з заходніх дабрачынных фондаў, які працаваў у Беларусі, такая выдумка можа выкарыстоўвацца ўладамі, каб нагнятаць падазронасьць да замежнікаў у беларускім грамадзтве напярэдадні сёлетніх прэзыдэнцкіх выбараў.