Пытаньні "Дзе Захаранка?" і "Дзе Завадзкі?" працягваюць гучаць :: Хартыя'97 :: Навiны

Аб`яднаная грамадзянская партыя заявіла пра свой намер працягваць нагадваць уладам аб прапалых бяз зьвестак Юры Захаранку, Віктары Ганчары, Анатолі Красоўскім і Зьміцеры Завадзкім. Пікеты больш чым у 30 рэгіёнах Беларусі пройдуць пад дэвізам "Хочам ведаць праўду". Пра гэта заявіў 2 траўня на прэсавай канферэнцыі ў Менску старшыня АГП Анатоль Лябедзька.

Трэба адзначыць, што акцыі, прысьвечаныя лёсам зьніклых на Беларусі вядомых людзей, вось ужо напрацягу двух месяцаў ва ўсіх рэгіёнах Беларусі праводзяць маладзёвы рух ЗУБР і прадстаўнікі іншых моладзевых арганізацыяў. Зараз і АГП мае намер правесьці ў першай дэкадзе траўня пікеты больш чым у 30 рэгіёнах Беларусі з тым, каб нагадаць пра лёсы зьніклых апанентаў Лукашэнкі.

Прадугледжана пікетаваньне беларускіх дыпляматычных прадстаўніцтваў у шэрагу краінаў блізкага й далёкага замежжа. У плянах таксама арганізацыя сустрэчаў са сваякамі зьніклых, правядзеньне мерапрыемства пад назваю "Жывы ланцуг", калі, як мяркуецца, тысячы менчукоў выйдуць на вуліцы сталіцы з партрэтамі Ганчара, Захаранкі, Карпенкі, Клімава і іншых вядомых беларускіх палітыкаў.

Як паказваюць дадзеныя сацыялягічных апытаньняў, 20% беларусаў ведаюць пра тое, што ў Беларусі зьнікаюць людзі, а 70% з тых, хто валодае такой інфармацыяй, мяркуюць, што да іхняга зьнікненьня датычны беларускія ўлады.