Альтэрнатывы афіцыйнаму ўсебеларускаму сходу не можа быць. Інакш - арышт :: Хартыя'97 :: Навiны

Жыхары Менску Сяргей Папкоў і Валерый Буйвал, якія накіравалі ў гарвыканкам заяўку на правядзеньне ў Менску 18 траўня сходу грамадзянаў, папярэджаны пра магчымыя негатыўныя для іх наступствы. 4 траўня заяўнікі былі выкліканы ў адзьдзел па сувязях з грамадзкасьцю ГУУС Менгарвыканкаму. Ад імя кіраўніцтва ГУУС ім было перададзена: усе, хто 18 траўня прыйдзе на Кастрычніцкую плошчу для ўдзелу ў сходзе, будуць затрымлівацца. Акрамя таго, калі арганізатары не адмовяцца ад заяўленага мерапрыемства, будуць узбуджаны справы па акцыях, што прайшлі 26 красавіка на праспекце Ф.Скарыны.

Заяўка ў гарвыканкам была накіравана 2 траўня. Ейныя аўтары, актывісты Кансэрватыўна-Хрысьціянскай партыі БНФ, прасілі даць дазвол на правядзеньне 18 траўня з 8 гадзінаў раніцы да 8 вечара на Кастрычніцкай плошчы сходу грамадзянаў з колькасьцю ўдзельнікаў да 5 тысячаў.

Мэта сходу, як вынікае з заяўкі, -- давесьці да міжнароднай грамадзкасьці наступнае: "грамадзяне Беларусі не прызнаюць ніякай "саюзнай дзяржавы" і "у адпаведнасьці з Канстытуцыяй будуць абараняць незалежнасць краіны". Пры гэтым аўтары заяўкі прасілі гарвыканкам не прапаноўваць для правядзеньня сходу лесапаркавую зону, ускраіну горада і іншыя такога кшталту месцы.

Трэба адзначыць, што 18 траўня ў Палацы Рэспублікі, які разьмешчаны якраз на Кастрычніцкай плошчы, будзе праходзіць другі Ўсебеларускі народны сход, ініцыіруемы ўладамі, паведамляе БелаПАН.