Папу Рымскага ў Расею й Беларусь не запрашаюць :: Хартыя'97 :: Навiны

Патрыярх Маскоўскі й Усея Русі не мае намеру запрашаць Папу Рымскага ў Расею. Пра гэта агенцтву Інтэрфакс заявіў глава Рускай Праваслаўнай Царквы Алексій Другі. Ён мяркуе, што візыт у Расею главы рымскай катаіцкай царквы "наўрадці магчымы ў хуткім часе". Асноўнаю перашкодаю да гэтага зьяўляецца, як ён выказаўся "экспансія каталіцызму", якая на думку Алексія другога разьвіваецца ў Расеі, Беларусі, на Ўкраіне, у Казахстане і шэрагу іншых зямель "на фоне выбачэньняў і словаў прымярэньня".

Дзяржаўны візыт кіраўніка Дзяржавы Ватыкан Яна Паўла ІІ ва Ўкраіну адбудзецца 23-27 чэрвеня. Украіна стане чацвёртай краінаю зь перавагаю праваслаўных вернікаў, якую наведае Папа Рымскі. Кіраўнік Ватыкана сустрэнецца з прэзыдэнтам Украіны Леанідам Кучмам. Папа Рымскі правядзе ў сталіцы Ўкраіны дзьве масавыя пропаведзі (па лацінскім і грэка-каталіцкім абрадах), дзьве імшы пантыфіка адбудуцца таксама ў Ільвове. Чакаецца, што ўдзел у іх возьме больш за паўмільёны паломнікаў з розных краінаў.

Амбасада Ўкраіны паведамляе, што паломнікі -- грамадзяне Беларусі -- могуць паехаць ва Ўкраіну як па ўнутраных пашпартах, што сьведчаць пра іх грамадзянства, так і па пашпартах, якія даюць права выезду за мяжу, паколькі паміж дзьвюма краінамі існуе бязьвізавы рэжым паездак. Грамадзяне іншых краінаў, якім неабходна віза ва Украіну, могуць зьвяртацца ў консульскія ўстановы амбасады Украіны ў Менску й Брэсьце.