Ваеннага параду ў Менску ня будзе з-за пасяўной. Няма паліва для баявой тэхнікі :: Хартыя'97 :: Навiны

Заўтра ў Менску не адбудзецца традыцыйны ваенны парад з нагоды Дня Перамогі. Па афіцыйнай версыі, ён не адменены, а перанесены на 3 ліпеня - Дзень вызваленьня Менску. У міністэрстве абароны кажуць, што мерапрыемства вырашана не праводзіць у сувязі з тым, што "дата не юбілейная", хаця да гэтага ў міністэрстве казалі, што падрыхтоўка да параду йдзе поўным ходам. Больш за тое, месяц таму, калі кіраўніцтву мінабароны прадстаўлялі ягонага новага главу Леаніда Мальцава, Лукашэнка заявіў, што першым іспытам для яго стане як раз парад з нагоды 9 траўня.

Сапраўдная прычына адмены параду вялікай тайнай не зьяўляецца - няма магчымасьці забясьпечыць праход баявой тэхнікі. Усё паліва пайшло на пасяўную. У гэтым годзе пасяўная кампанія ў Беларусі праходзіць асабліва напружана, адна з галоўных прычынаў - скарачэньне паставак расейскай нафты. Каб забясьпечыць сельгастэхніку, прыйшлося прывесьці ў дзеяньне ўсе рэзэрвы паліва. Парад магчыма было правесьці за кошт стратэгічнага недакранальнага запасу саміх узброеных сілаў, але новы міністар вырашыў гэтага не рабіць і папрасіў Лукашэнку яго адмяніць.

Былы міністар абароны Пётар Чаус зьдзўляецца таму, у якой форме прынята рашэньне: "Становішча ў краіне сапраўды цяжкое і рэсурсы непараўнальныя з тымі, што былі раней. Але ў Расеі ваенныя парады праводзяцца бяз тэхнікі, і ўсе праблемы адразу здымаюцца. Мы маглі паступіць таксама".

Але, хутчэй за ўсё, такі варыянт не падыходзіць Аляксандру Лукашэнку. Яму неабходна прадэманстраваць магутнасьць беларускай арміі, а тут бяз тэхнікі ніяк не абыйдзешся. Таму няхай і са спазьненьнем, але ваенны парад усё ж такі адбудзецца з патрэбным размахам. А 9 траўня Лукашэнка прыме ўдзел у грамадзянскім шэсьці па вуліцах сталіцы, паведамляе газэта "Час навінаў".