Лукашэнка ўзбройваецца супраць НАТА :: Хартыя'97 :: Навiны

Беларусь плянуе паступовае павелічэньне бюджэтных сродкаў, што йдуць на абарону. Пра гэта, па інфармацыі ИТАР-ТАСС, заявіў дзяржаўны сакратар Савету бясьпекі краіны Урал Латыпаў, каментуючы сьцьвярджэньне ў пятніцу канцэпцыi нацыянальнай бясьпекі. Дадатковыя сродкі, паведаміў ён, пойдуць на мадэрнізацыю арміі й закупку новых сучасных узбраеньняў. Пералік мераў па рэалізацыі новай канцэпцыі будзе прадастаўлены Лукашэнку напрацягу трох месяцаў. Урал Латыпаў падкрэсьліў, што ў працы над дакумэнтам "прымуць удзел усе дзяржаўныя структуры, паколькі згодна канцэпцыі, пагрозы трэба адлюстроўваць у розных сфэрах - эканамічнай, экалягічнай, гуманітарнай, інфармацыйнай, зьнешнепалитычнай".

Да зьнешнепалітычных пагрозаў, па словах дзяржсакратара Савета бясьпекі, Беларусь адносіць пашырэньне блоку НАТА, гатоўнасьць шэрагу дзяржаваў вырашаць міжнародныя праблемы з дапамогаю ваеннай сілы. "Таму мы разглядаем саюз з Расеяй магутнай гарантыяй сваёй бясьпекі і ў эканамічных і, асабліва, ваенна-палітычных адносінах", -- сказаў Урал Латыпаў.

Пры гэтым ён падкрэсьліў, што беларускае кіраўніцтва лічыць неабходным вывесьці беларускую армію на новы высокі ўзровень эфектоўнасці з выключна высокай інтэлектуальнай кампанентай з тым, каб яна была гатовая "па-першае, да абарончай вайны, па-другое - да сучаснай вайны". Такая неабходнасьць, па ягоных словах, дыктуецца балканскім вопытам.