Нарвегія гатова аказаць дапамогу ў дэмакратызацыі Беларусі :: Хартыя'97 :: Навiны

Міжнародная канфэрэнцыя "Беларусь паміж Усходам і Захадам: 2001 год прэзыдэнцкіх выбараў і ўпэўненая перамога дэмакратыі" скончылася ў Осла 11 траўня. Цікавасьць эўрапейскай супольнасьці да грамадзка-палітычнай сытуацыі Беларусі абумоўленая, у першую чаргу, набліжэньнем прэзыдэнцкіх выбараў. Адна з умоваў міжнароднага прызнаньня іх вынікаў - дэмакратычнасьць і адкрытасьць. Гэта ўвесь час падкрэсьлівалі замежныя выступоўцы. "Гэта была вельмі важная канфэрэнцыя. Тое, што гэта адбылося ў Осла, што прысутнічалі прадстаўнікі скандынаўскіх краінаў -- усё гэта вельмі важна для Беларусі, бо Беларусь належыць да рэгіёну Бальтыйскага мора. Сытуацыя ў Беларусі павінна цікавіць і непакоіць нашых суседзяў -- і ня толькі ў краінах Балтыі, але і ў скандынаўскіх краінах", -- заявіў адзін з удзельнікаў канферэнцыі міжнародны каардынатар Хартыі-97 Андрэй Саньнікаў.

"Тое, што прадстаўнікі скандынаўскіх краінаў добра ведаюць сытуацыю у Беларусі, і тое, што яны занепакоеныя гэтай сытуацыяй, азначае: больш увагі будзе надавацца падчас прэзыдэнцкіх выбараў. Прадстаўнікі й Міністэрства замежных справаў, і парлямэнту, і няўрадавых арганізацыяў казалі пра тое, што яны пільна адсочваюць і будуць дапамагаць дэмакратычным сілам бараніць правы чалавека ў Беларусі й адстойваць інтарэсы дэмакратыі і ў міжнародным кантэксьце (гэта значыць, і ў АБСЭ, і ў Эўразьвязе), і ў іншых міжнародных арганізацыях", - пракаментаваў Андрэй Саньнікаў.