МВФ знаёміцца зь беларускім рынкавым сацыялізмам :: Хартыя'97 :: Навiны

Місія Міжнароднага валютнага валютнага фонду пачала сёньня працу ў Менску. МВФ мог бы да восені гэтага года выдзеліць Беларусі стабілізацыйны крэдыт у памеры некалькіх соцен мільёнаў даляраў, але галоўная ўмова выдачы крэдыту - увядзеньне рынкавых механізмаў у беларускую эканоміку і страманьне інфляцыі. Так што галоўнай задачаю візыту МВФ у Беларусь, па ўсёй верагоднасьці, стане высьвятленьне прынцыпіяльнага пытаньня: якую ўсё ж такі фінансавую палітыку зьбіраецца праводзіць Беларусь, і ці гатова кіраўніцтва краіны дзеля атрыманьня такога неабходнага крэдыту адступіць ад сваіх унікальных прынцыпаў рынкавага сацыялізму.

Аднак сёньняшні ўрад наўрадці пойдзе на зьмяненьне сваёй палітыкі. "Беларусь засталася ў Цэнтральнай Эўропе, у акружэньні ўсіх суседзяў, якія робяць рынкавыя пераўтварэньні, адзінай краінаю таталітарнага, адміністратыўнага рэжыму і адміністратыўнага ўпраўленьня эканомікай", - заявіў у інтэрвію НТБ былы старшыня Нацыянальнага банка Рэспублікі Беларусь Станіслаў Банданкевіч.

Багданкевіч пайшоў з ураду Лукашэнкі ў 1995 годзе. Тады МВФ выдаў Беларусі першы стабілізацыйны крэдыт у памеры 300 мільёнаў даляраў. Як згадвае Багданкевіч, абсалютная большасьць умоваў крэдыту беларускае кіраўніцтва і не зьбіралася выконваць. Што будзе з другім стабілізацыйным крэдытам зараз не зразумела, але, па словах былога старшыні Нацыянальнага банка краіны, магчыма, што абяцаньні рынкавых рэформаў так і застануцца пустымі абяцаньнямі Беларусі МВФ.