Кіраўніка КНГ АБСЭ высылаюць зь Беларусі :: Хартыя'97 :: Навiны

Беларускі віцэ-прэм`ер і міністар замежных справаў Міхаіл Хвастоў заявіў, што кіраўніцтвам Беларусі разглядаецца магчымасьць высылкі з краіны кіраўніка Кансультатыўна-назіральнае групы АБСЭ ў Беларусі пасла Ханса Георга-Віка. "Мы далі знаць паслу, што больш не будзем трываць дзейнасьць, накіраваную на кансалідацыю намаганьняў па дэстабілізацыі ў краіне. Мы далі зразумець, што калі ён будзе працягваць такую дзейнасьць, мы будзем разглядаць пытаньне аб яго знаходжаньні. Мы ня будзем гуляць у хованкі, мы не вядзем нейкай закрытай гульні. Але дзейнасьць пасла ня можа быць дэструктыўнай для ўраду, і ўрад рана ці позна павінен паставіць пра гэта пытаньне. Пытаньне ўзьнята, і калі пытаньне будзе даведзена да канца, мы проста папросім пасла пакінуць тэрыторыю нашай краіны". Такім чынам, сёньня ў сваім выступе на брыфінгу ў МЗС, М.Хвастоў падцьвердзіў учарашнюю інфармацыю прэсавага цэнтра Хартыі`97.

Дэструктыўным момантам у дзейнасьці Х.-Г.Віка М.Хвастоў лічыць арганізацыю замежнага фінансаваньня ўнутраных назіральнікаў на прэзыдэнцкіх выбарах.

Гэтыя праблемы М.Хвастоў і старшыня КДБ Беларусі Леанід Ерын абмеркавалі з паслом Вікам на мінулым тыдні. Сутнасьць прэтэнзыяў ураду Беларусі да пасла Віка й КНГ АБСЭ М.Хвастоў патлумачыў так:

"Сёньня мы ўпэўнены, што на гэтым этапе разьвіцьця АБСЭ, намецілася тэндэнцыя, якая выклікае занепакоенасьць. Мы фактачна сутыкаемся са спробамі ператварыць АБСЭ ў інструмэнт заходніх краінаў па кантролю за дэмакратыямі ва Ўсходныя Эўропе. Некаторыя аспэкты дзейнасьці Кансультыўна-назіральнае групы АБСЭ ў Беларусі таксама выклікаюць занепакоенасьць і неразуменьне з нашага боку і гэта ў першую чаргу датычыць дзейнасьці групы ў рамках праэкту па арганізацыі сеці ўнутранага назіраньня за надыходзячымі прэзыдэнцкімі выбарамі. Выбарчы кодэкс Беларусі прадстаўляе ўсе магчымасьці для правядзеньня ўнутранага назіраньня, аднак на мінулых парлямэнцкіх выбарах у красавіку, у колькасьць назіральнікаў былі ўключаны толькі прадстаўнікі апазыцыі, і КНГ заплаціла ім за працу. Гэта выклікае занепакоенасьць з боку ўрада. Я неаднаразова размаўляў на гэту тэму са сп.Вікам, і мы ў свой час вырашылі не падымаць гэтае пытаньне перад АБСЭ. Зараз мы ўяўляем, што кіраўнік АБСЭ пасол Вік імкнецца аб`яднаць беларускую апазыцыю і выступіць свайго роду лідэрам. Такім чынам, КНГ ператварылася ў акцёра, які іграе на палітычнай сцэне Беларусі. Гэта не проста словы, мы маем факты. І гэты акцёр іграе супраць ураду."

Па словах М.Хвастова, прэтэнзыі ў МЗС ёсьць толькі да дзейнасьці пасла Віка.