Віншуем Юру Завадзкага! :: Хартыя'97 :: Навiны

22 траўня спаўняецца 10 гадоў Юры Звадзкаму. Ягоны тата, журналіст Зьміцер Завадзкі зьнік праз 10 месяцаў таму. Увесь гэты час Юра чакае бацьку і спадзяецца, што ён жывы. Хлопчык называе сябе "вялікім мужыком у маленькім целе".

Бо ён адзіны мужчына ў сям`і Завадзкіх. Вось што распавядае пра Юру яго маці, Сьвятлана Завадзкая:

"Юрка мая адзіная падтрымка. Нягледзячы на тое, што яму ўсяго 10 гадоў, ён так падтрымлівае й суцяшае мяне. Не спыняецца паўтараць, што з "нашым татам усё ў парадку". Кажа пра бацьку толькі ў цяперашнім часе: ніколі "тата ня ўмеў", заўсёды "тата ўмее".

Ён плакаў усяго толькі адзін раз - калі глядзеў фільм Паўла Шарамета"Дзкікае паляваньне". Ніколі не пытаецца ў мяне: "Дзе тата?" Разумее, што мне балюча адказваць на гэтае пытаньне. Ведаеце, як Юра сябе называе? "Вялікім мужыком у маленькім целе". І, сапраўды, ён стаў такім вялікім пасьля зьнікненьня бацькі.

Але ўсё ж такі ён маленькі хлопчык, якому вельмі не хапае бацькі. Кожную раніцу дастаю з-пад ягонай падушкі Дзіміны здымкі. Кажа, што хоча, каб тата паспаў зь ім… Тайна ад мяне кожны дзень, як ідзе ў школу, цалуе Дзімін партрэт.

Дзіма для яго быў усім. Яны й дня адзін без аднаго правесьці не маглі: заўсёды штосьці рабілі, гулялі, урокі рабілі. І тату, у адрозьненьні ад мяне, Юра слухаў бяспярэчна. Калі Дзіма зьнік, я баялася, што не спраўлюся з сынам. Але выйшла наадварот: такім паслухмяным, як зараз, ён ніколі ня быў".

У твой дзень народзінаў, Юра, мы кажам табе: "Мацуйся, мужычок! Не губляй надзею і як можаш падтрымай маму Сьвету й бабулю Олю. Мы з табой!"

Хартыя-97

Напрацягу некалькі дзён, што засталіся да дня народзінаў Юры вы можаце адправіць яму свае віншаваньні на нашу электронную адрэсу charter@charter97.org. Мы абявязкова перададзім хлопцу ўсе вашы лісты з пажаданьнямі ў гэтае сьветлае сьвята.