Неспрыяльны інвестыцыйны імідж краіны зьвязаны з высокімі палітычнымі рызыкамі :: Хартыя'97 :: Навiны

Замежныя інвестыцыі ў беларускі страхавы сэктар стрымліваюцца не заканадаўчымі абмежаваньнямі, а агульным неспрыяльным інвестыцыйным іміджам краіны, сказалі ў камэнтары "Інтэрфаксу" эксперты страхавога рынку. "Перашкоды для інвестыцыяў, хутчэй за ўсё, трэба шукаць у агульным уяўленьні замежнікаў пра неспрыяльны інвестыцыйны клімат у рэспубліцы, высокіх палітычных рызыках і недасканаласьці нацыянальнага заканадаўства аб прадпрымальніцтве", - заявіў намесьнік старшыні Дзяржкамітэту на нагляду за страхавой дзейнасьцю пры Мінфіне Беларусі Міхаіл Піліпейка.

"Адсутнасьць прыросту замежных інвестыцыяў у страхавой сыстэме зьвязана не столькі са становішчам у дадзеным сэктары, колькі з агульнымі прычынамі, якія стрымліваюць замежныя інвестыцыі ў эканоміку Беларусі", -- сказаў М.Піліпейка.

З 42 страхавых кампаніяў, што працуюць сёньня ў Беларусі, замежныя інвестыцыі ва ўстаноўчым капітале маюць 12 страхоўшчыкаў, паведаміў ён. Агульная доля замежнага ўдзелу зараз эквівалентна USD 3,2 млн, што складае прыкладна 6,2% ад агульнага памеру фінансавых актываў усіх беларускіх страхоўшчыкаў супраць прыкладна 10% год таму.

Такі пункт гледжаньня падзяляе й прэзыдэнт Беларускага страхавога саюзу (БСС) Віктар Хамярчук. На яго думку, галоўнай перашкодай для прытоку замежных інвестыцыяў зьяўляюцца ня тыя абмежаваньні, якія ўтрымліваюцца ў заканадаўстве, а агульная эканамічная сытуацыя ў краіне.

Па словах прэзыдэнта БСС, праблема нізкай прывабнасьці беларускага рынку для замежных страхоўшчыкаў заключаецца ў тым, што ў краіне вялікую ўдзельную вагу займаюць неэфектоўна працуючыя дзяржаўныя прадпрыемствы, якія "ня могуць сабе дазволіць укладаць грошы ў будучае фірмы, а да такіх інвестыцыяў адносяцца і выдаткі на страхаваньне". Па ягоных словах, замежнікі таксма баяцца праблемаў з рэпатрыяцыяй прыбыткаў зь Беларусі.