У Польшчы крытыкуюць члена парлямэнту за выступ на Ўсебеларускім народным сходзе :: Хартыя'97 :: Навiны

Прэса й палітычныя колы Польшчы шырока камэнтуюць выступ дэпутата Сэйму ад левых сілаў, старшыню Беларускага грамадзка-культурнага таварыства Яна Сычэўскага на Ўсебеларускім народным сходзе 18 траўня ў Менску, паведамляе радыё "Свабода".

На сходзе Сычэўскі казаў, што Польшча й Беларусь зьяўляюцца маладымі дэмакратыямі, якія перажываюць трансфармацыю. Аднак вызначэньняў дэмакратыі, на думку Сычэўскага, некалькі. У Польшчы - гэта народная ўлада, але пад дыктатам замежных дзяржаваў. Дэпутат асудзіў таксама польскі варыянт прыватызацыі, заснаваны на продажу дзяржаўнай уласнасьці за дзясятую частку кошту. Сычэўскі ўхваліў беларускія ўлады за тое, што яны не дапускаюць раскраданьня дзяржуласнасьці, калі прыбытак ідзе не на патрэбы ўсяго грамадзтва, а ў кішэні кучкі бізнэсмэнаў. Ён таксама адзначыў, што абвінавачваньні з боку Польшчы і іншых краінаў у адрас Беларусі "не заўсёды абгрунтаваныя", і што калі Беларусь ня слухае павучаньняў, то гэта ня значыць, што яна - недэмакратычная дзяржава.

Учора ў размове з журналістамі Сычэўскі заявіў, што Беларусь для яго - другая этнічная радзіма. Ён адзначыў, што ў Менску ён як госьць ня мае права крытыкаваць гаспадароў, а на настойлівае пытаньне журналістаў заявіў, што "ў параўнаньні з Расеяй і Ўкраінай, Беларусь спраўляецца няблага".

Выступ дэпутата на Ўсебеларускім сходзе асудзілі партыя Унія Свабоды і Саюз Правых Сілаў. Саюз Левых Сілаў назваў заяву Сычэўскага "недарэчным" і мае намер патрабаваць ад калегі тлумачэньняў.