"Вертыкальшчыкі" ідуць у адстаўку :: Хартыя'97 :: Навiны

Заяву з просьбай аб адстаўцы падаў старшыня камітэту па эканоміцы і рыначных стасунках, намесьнік старшыні Брэсцкага аблвыканкаму Ўладзімер Сьцяпанаў. У гутарцы з карэспандэнтам БелаПАН Сьцяпанаў патлумачыў, што не жадае больш працаваць у ізаляцыі, якой ён падвяргаецца з боку кіраўніцтва вобласьці пасьля ягонага ўдзелу ў выбарах у беларускі парлямэнт.

Сьцяпанаў працаваў у аблвыканкаме шмат гадоў, аднак пасьля прыходу на пасаду старшыні Васіля Далгалёва, паводле ягоных словаў, узьніклі некаторыя цяжкасьці ва ўзаемаадносінах. Характарызуючы працу ў аблвыканкаме з прыходам Далгалёва, Сьцяпанаў сказаў, што зараз "аўтарытарны стыль кіраўніцтва набірае абароты, аб калегіяльнасьці можна забыць".

Сцяпанаў браў удзел у выбарах у парлямэнт яшчэ ў кастрычніку. Тады ў акрузе, дзе ён балатаваўся, выбары не адбыліся. Перад правядзеньнем паўторных выбараў Сьцяпанаву адкрыта далі зразумець, што дэпутатам па акрузе № 3 хацелі б бачыць галоўнага дзяржаўнага санітарнага доктара вобласьці Валянціну Качан. Адразу ж на старонках мясцовых газэтаў і ў перадачах мясцовага тэлебачаньня зьявілася негатыўная інфармацыя пра Сьцяпанава. "Гэта быў нават не кампрамат, а самы страшны чорны піар. Паступіла каманда мяне прынізіць, дыскрэдытаваць. Я падаў у суд зыскавую заяву аб абароне гонару і годнасьці", -- распавёў Сьцяпанаў.

Што да далейшых дзеяньняў, то пасьля падачы заявы аб звальненьні Сьцяпанаў ідзе ў адпачынак, потым мае намер працаўладкоўвацца.