У Беларусі ўзрасла дзіцячая сьмяротнасьць :: Хартыя'97 :: Навiны

У першым кварталі 2001г. колькасьць насельніцтва Беларусі паменьшылася на 9,2 тысячаў чалавек і склала на 1 красавіка 2001 года 9.981,2 тысячы. У першым кварталі 2001 года памерла 230 дзяцей ва ўзросьце да аднаго года (у першым кварталі 2000 года - 214). Паказчык дзіцячай сьмяротнасьці склаў 9,8 памерлых дзяцей ва ўзросьце да 1 года на 1.000 народжаных супраць 9,2 за першы кварталь 2000 года. У структуры прычынаў сьмерці дзяцей першага года жыцьця 68% складаюць прычыны перынатальнага перыяду і ўроджаных анамаліяў.

Скарачэньне, як і ў папярэднія гады, абумоўлена пераўзыходам на 12,3 тысячаў колькасьці памерлых над народжанымі пры адначасовым памяньшэньні міграцыйнага прыросту. У параўнаньні з І кварталем 2000 г. колькасьць памерлых у агуле па краіне паменьшылася на 6,9%.

Зьніжэньне сьмяротнасьці ў асноўным зьвязана з зьніжэньнем колькасьці выпадкаў сьмерці ад хваробаў дыхальных ворганаў (на 25,9%), хваробаў сыстэмы крывазвароту (на 4,8%), няшчасных выпадкаў, атручваньняў і траўмаў (на 4,5%), новаўтварэньняў (на 0,9), сьмяротнасьць ад інфекцыйных і паразытарных захворваньняў засталася на ўзроўні І кварталю 2000 г. Ад гэтых прычынаў памерла 86% усіх памерлых у І кварталі 2001 г., у тым ліку ад хваробаў сыстэмы крывазвароту - 56%.

Хваробы сыстэмы крывазвароту зьяўляюцца прычынаю сьмерці 32% насельніцтва, памерлага ў працаздольным узросьце, няшчасныя выпадкі, атручваньні й траўмы - 35% насельніцтва. Сьмяротнасьць ад сухотаў павялічылася на 4% і складае 78% ад агульнай колькасьці выпадкаў сьмерці ад інфекцыйных і паразытарных захворваньняў. Сьяротнасьць насельніцтва ад прычынаў, не зьвязаных з захворваньнямі, у агуле зьнізілася на 4,5%.