У Адміністрацыі Прэзыдэнта нэрвова адрэагавалі на "ўцечку" інфармацыі ад групы "Y" :: Хартыя'97 :: Навiны

Адміністрацыя Лукашэнкі вельмі нэрвова адрэагавала на аналітычную запіску групы "Y", якая была абнародавана ўчора. Памочнік главы дзяржавы, намесьнік главы камісыі па міжнародным справам і сувязям з СНД ніжняй палаты "парлямэнту" Аляксандар Шпілеўскі заявіў у інтэрвію "Інтэрфаксу", што "ніякіх падобных сцэнараў на паседжаньнях у Адміністрацыі Прэзыдэнта не распрацоўваецца". Па ягоных словах, у Адміністрацыі "ідзе звычайны інструктаж, які зводзіцца да таго, што выбары мусяць прайсьці ў адпаведанасьці з выбарчым заканадаўствам".

Пры гэтым парлямэнтарый падкрэсьліў, што ў Адміністрацыі Прэзыдэнта працуюць "законапаслухмяныя грамадзяне Беларусі". На думку Шпілеўскага, "такога кшталту домыслы зьяўляюцца звычайнай піар-акцыяй, якая ўкладаецца ў схему дыскрэдытацыі ўлады і ейная мэта папярэдне стварыць грамадзкую думку аб нелігітымнасьці будучых выбараў".

Учора ад імя згаданай групы было распаўсюджана паведамленьне пра тое, што беларускія ўлады пачалі рэалізацыю "жорсткага сцэнару прэзыдэнцкіх выбараў". Сярод плянаваных у гэтым сцэнары захадаў называецца абвешчаньне Х.-Г.Віка пэрсонаю нон-грата, закрыцьцё шэрагу недзяржаўных мэдыяў, дыскрэдытацыя альтэрнатыўных А.Лукашэнку кандыдатаў у прэзыдэнты.